جۇمىسقا ورنالاسۋعا «استانا جاستارى» رەسۋرستىق ورتالىعى كومەكتەسەدى

استانا. قازاقپارات - ەلوردادا جاستار اراسىندا جۇمىسسىزدىقتى تومەندەتۋ، جۇمىسقا ورنالاستىرۋ جانە كاسىپتىك باعدار بەرۋ بويىنشا جۇمىستار بەلسەندى جۇرگىزىلىپ جاتىر.

بيىل «استانا جاستارى» رەسۋرستىق ورتالىعى 2500 ادامدى قامتىعان 8 شارا وتكىزدى.

ورتالىق قىزمەتىنىڭ ماڭىزدى باعىتتارىنىڭ ءبىرى جۇمىسقا ورنالاسۋ كەزىندە ىشكى توسقاۋىلداردى ەڭسەرۋ، كومۋنيكاتسيا ماشىقتارىن الۋ جانە سۇحباتتاردا ءوزىن-ءوزى تانىستىرۋ بويىنشا ترەنينگتەر وتكىزۋ بولىپ تابىلادى. ترەنينگتەر 2015-جىلدان بەرى اي سايىن ۇيىمداستىرىلىپ كەلەدى، جالپى، 450 ادام وقىتىلدى.

ۇستىمىزدەگى جىلى پروفيلدى بوس ورىندار جارمەڭكەلەرىن وتكىزۋ تۋرالى شەشىم قابىلداندى. ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە وتكەن تەحنيكالىق پروفيلدەگى العاشقى جارمەڭكەدە 18 ادام تۇراقتى جۇمىسقا ورنالاستىرىلدى. سونىمەن قاتار، م. وتەمىسوۆ اتىنداعى وقۋشىلار سارايىندا گۋمانيتارلىق باعىتتاعى بوس ورىندار جارمەڭكەسى ۇيىمداستىرىلدى. شارا قورىتىندىسى بويىنشا 15 ەلوردالىق جۇمىسپەن قامتىلدى. جاقىندا ساۋدا-ەكونوميكالىق پروفيلدەگى بوس ورىندار جارمەڭكەسى ءوتتى. مۇنداي شارالاردى جىل سوڭىنا دەيىن وتكىزۋ جوسپارلانعان.

قازىرگى كەزدە «استانا جاستارىندا» تىركەلگەن جۇمىس ىزدەۋشىلەر سانى 385 ادامدى قۇرايدى، 71 ادام جۇمىسقا ورنالاستىرىلدى، دەپ حابارلايدى ەلوردا اكىمدىگىنىڭ رەسمي سايتى.

ايتا كەتەيىك، ورتالىقتا قۇقىقتىق كومەك تە كورسەتىلەدى. جىل باسىنان بەرى 90 ادامعا كونسۋلتاتسيا بەرىلدى، سونىڭ ىشىندە %50 ستۋدەنتتەر، %15 وقۋشىلار، سونداي-اق، %35 جەكە تۇلعالار. نەگىزىنەن، ادامدار ەڭبەك قاتىناستارى، وتباسىلىق جانە ازاماتتىق قۇقىق، سونداي-اق تۇرعىن ءۇي الۋ باعدارلامالارىنا قاتىستى ماسەلەلەر بويىنشا جۇگىنەدى.