ءماجىلىس دەپۋتاتى جول ەرەجەلەرىن بۇزۋعا بايلانىستى ايىپپۇلدى ازايتۋدى ۇسىنادى

استانا. قازاقپارات - ءماجىلىس دەپۋتاتى مۇحتار تىنىكەيەۆ جول ەرەجەلەرىن بۇزۋعا بايلانىستى كەيبىر جاۋاپكەرشىلىكتەردى جەڭىلدەتىپ، ايىپپۇلدى تومەندەتۋدى ۇسىنادى.

بۇل تۋرالى بۇگىن ماجىلىستەگى جۇمىس توبىندا «جول ءجۇرىسى تۋرالى» ق ر زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋ بارىسىندا ءمالىم بولدى.

اتالعان زاڭ جوباسىنا ءبىرقاتار دەپۋتاتتار باستاماشىلىق جاساعان بولاتىن.

«مەملەكەت باسشىسى بۇقارا حالىقتىڭ كوڭىلى تولمايتىن زاڭداردى ناقتىلاپ، ءارى تياناقتى ەتىپ قايتا قاراۋ تۋرالى ماسەلە قويعان بولاتىن. بۇل زاڭ جوباسى دا جۇرگىزۋشىلەر، اۆتواۋەسقويلار تاراپىنان ۇلكەن سىنعا ۇشىرادى، تەرىس اسەر تۋدىرىپ جۇرگەنى شىندىق»، - دەيدى زاڭ جوباسىنا باستاماشىلىق جاساعان دەپۋتاتتىڭ ءبىرى مۇحتار تىنىكەيەۆ.

ونىڭ سوزىنە قاراعاندا، باس پروكۋراتۋرانىڭ ءوزى قازىرگى قولدانىستاعى «جول ءجۇرىسى تۋرالى» زاڭ نورمالارىنا قاتىستى تەرىس الەۋمەتتىك سالدارعا سوقتىراتىن ءۇش فاكتىنى اتاعان. «ءبىرىنشى كەزەكتە، كۇردەلى ەكونوميكالىق احۋال جاعدايىندا حالىقتىڭ تابىسىنا كەرى اسەر ەتەدى. پروكۋراتۋرا مالىمەتتەرىنە قاراعاندا، سوڭعى 15 جىلدا وسى سالاداعى ايىپپۇلدار كورسەتكىشى 25 ەسەگە ارتقان، ال حالىقتىڭ تابىسى 7 ەسەگە عانا كوتەرىلدى»، - دەدى مۇحتار تىنىكەيەۆ. ونىڭ ايتۋنىشا، جول-پاترۋل قىزمەتكەرلەرى سالعان ايىپپۇلدىڭ باسىم بولىگى وندىرىلمەيدى. وسى ماسەلەلەردى ەسكەرە كەلە دەپۋتات ءبىرقاتار نورمالاردى جەڭىلدەتۋدى ۇسىنادى.

اتاپ ايتقاندا، لاستانىپ، دۇرىس كورىنبەيتىن ءنومىر بەلگىلەرىمەن جۇرگەن كولىك يەلەرىنە سالىناتىن ايىپپۇلدى الىپ تاستاۋ نەمەسە تومەندەتۋ ۇسىنىلدى. ويتكەنى، دەپۋتاتتىڭ ايتۋىنشا، قازاقستانداعى ەلدى مەكەندەردىڭ باسىم بولىگىندە اۆتوكولىكتىڭ ءنومىر بەلگىلەرى ءجيى بىلعانادى، ال بۇل كولىك جۇرگىزۋشىسىنىڭ كىناسىنەن دە ەمەس. بۇدان بولەك، دەپۋتات قاۋىپسىزدىك بەلبەۋلەرىن تاقپاعانى ءۇشىن دە جاۋاپكەرشىلىكتى جەڭىلدەتۋ قاجەتتىگىن ايتىپ وتىر. سونىمەن قاتار، م. تىنىكەيەۆ قالالىق جەرلەردە جۇرگەندە كولىكتىڭ فارالارىن جاعۋعا مىندەتتى ەمەس دەگەندى العا تارتىپ، ونى تەك قالا سىرتىنداعى اۆتوجولداردا مىندەتتەۋ كەرەكتىگىن ۇسىنادى.

اۆتور: قانات مامەتقازى ۇلى