ەسىموۆ: بايقوڭىردىڭ تۋريستىك الەۋەتى وبلىستاعى بارلىق مۇناي كەن ورىندارىنان دا ارتىق تابىس اكەلەر ەدى
بۇگىن «ەكسپو-2017» حالىقارالىق مامانداندىرىلعان كورمەسىن ۇيىمداستىرۋ جانە وتكىزۋ جونىندەگى قوعامدىق كەڭەستىڭ ءۇشىنشى وتىرىسىندا «استانا ەكسپو-2017» ۇ ك» ا ق باسقارما ءتوراعاسى احمەتجان ەسىموۆ وسىلاي ءمالىم ەتتى.
كەڭەس بارىسىندا سويلەگەن كومپانيا باسشىسى حالىقارالىق كورمەنىڭ «بولاشاق ەنەرگياسى» اتتى تاقىرىبىنا الەمدىك قىزىعۋشىلىق ارتىپ وتىرعانىن ايتتى.
«بۇل تاقىرىپ الەمدىك ەكونوميكانى كۇيزەلتە باستاعان جاھاندىق داعدارىس اياسىندا دا وزەكتى بولىپ وتىر. ويتكەنى، بۇگىنگى داعدارىس كومىرسۋتەك شيكىزاتتارىنا الەمدىك باعانىڭ قۇلدىراۋى سالدارىنان ورىن العانى بەلگىلى. سوندىقتان دا، بالاما ەنەرگەتيكا بۇگىنگى الەمنىڭ ەڭ وزەكتىسى. ءبىر عانا مىسال: داعدارىس سالدارىنان مۇناي جانە گاز سەكتورىنا ينۆەستيتسيا 450 ميلليارد دوللارعا تەجەلگەن. ال كەرىسىنشە، بىلتىرعى جىلى جاڭارتىلاتىن ەنەرگيا كوزدەرىنە ينۆەستيتسيا سالۋ 339 ميلليارد دوللاردى قۇرادى»، - دەپ اتاپ ءوتتى ا. ەسىموۆ.
ونىڭ ايتۋىنشا، جالپى ەنەرگەتيكا ۇلەسىندە جاڭارتىلاتىن ەنەرگيانىڭ ۇلەسى 15 پايىز بولسا، 2050 -جىلعا قاراي بۇل 50 پايىزعا جەتەتىن بولادى. سونىمەن قاتار، كوستو- ريكا سەكىلدى مەملەكەتتەر 100 پايىز جاڭارتىلاتىن ەنەرگەتيكاعا كوشىپ وتىر. بۇدان بولەك، فينليانديا بۇعان دەيىن حالىقارالىق كورمەلەرگە نەگىزىنەن ءبىر پاۆيلوندا باسقا ءبىر مەملەكەتپەن بىرلەسىپ قاتىساتىن ەدى. «ەكسپو-2017» كورمەسىنىڭ تاقىرىبىنا قىزىعۋشىلىق بىلدىرگەن ولار كەلەسى جىلى ءوز الدىنا جەكە پاۆيلون سۇراعان.
«ەكسپو - تۋريزم الەۋەتىنە جول اشاتىن داڭعىل بولۋى كەرەك. مەن جاقىندا ءبىزدىڭ بايقوڭىردى امەريكانىڭ كاناۆەرال مۇيىسىندەگى ايلاقپەن سالىستىرعان ماقالانى وقىدىم. اقش ايلاعىنا جىل سايىن 3 ميلليون تۋريست كەلەدى ەكەن. ەگەر ءاربىر تۋريست ورتا ەسەپپەن مىڭ دوللار «قالدىراتىن» بولسا، وندا 3 ميلليون تۋريستى كوز الدىڭىزعا ەلەستەتىڭىزشى؟ ءبىزدىڭ قىزىلوردا وبلىسىنداعى بايقوڭىرعا وسىنشاما تۋريست كەلەتىن بولسا شە؟ جالپى بايقوڭىر الەۋەتى وبلىستاعى قۇمكول سەكىلدى باسقا دا بارلىق مۇناي كەن ورىندارىنان دا ارتىق تابىس بەرەتىن ەدى»، - دەدى ا. ەسىموۆ.
اۆتور: قانات مامەتقازى ۇلى
