قازان ايىندا ەكسپو- نىڭ ءبىرقاتار نىساندارى پايدالانۋعا بەرىلەدى
«ەكسپو قالاشىعىندا جۇمىس قىزۋ. ءبىز حالىقارالىق پاۆيلونداردى، تاقىرىپتىق جانە كوممەرتسيالىق پاۆيلوندار قۇرىلىسىنىڭ جۇمىستارىن اياقتاپ قالدىق. قاتىسۋشىلار ءۇشىن «ەكسپو قالاشىعىنىڭ» قۇرىلىسى دا اياقتالۋعا جاقىن. قازان ايىندا وسى نىساندار پايدالانۋعا بەرىلەدى. ولار قالالىق ينجەنەرلىك جەلىلەرگە تولىق قوسىلۋ ۇستىندە. سونىمەن قاتار، اباتتاندىرۋ جۇمىسى دا ءبىر مەزەتتە جۇرگىزىلىپ جاتىر. وسىعان بايلانىستى قازان ايىندا قاتىسۋشى مەملەكەتتەردىڭ ءبىرازى وزدەرىنىڭ ۇلتتىق پاۆيلوندارىن بەزەندىرۋمەن اينالىسا باستايدى»، - دەدى «استانا ەكسپو 2017» ۇ ك» اق باسقارما ءتوراعاسى احمەتجان ەسىموۆ.
ونىڭ ايتۋىنا قاراعاندا، كومپانيانىڭ حالىقارالىق دەپارتامەنتى شەتەلدىك قاتىسۋشىلارمەن پاۆيلونداردى بەزەندىرۋگە قاتىستى جۇمىستاردى دا اتقارۋدا. «بۇگىنگى كۇنى 70 قاتىسۋشى- مەملەكەت قول قويىلدى. وزدەرىنىڭ قاتىسۋعا نيەتىن 99 مەملەكەت راستادى. ياعني، ءبىزدىڭ دىتتەگەن 100 مەملەكەت قاتىسادى دەگەن جوسپارىمىزعا ەش كۇمان بولمايدى. ءبىز جاقىن ارادا 100 - مەملەكەتپەن (كەلىسىمگە - رەد) قول قويامىز. قاتىساتىندىعىن راستاعان 99 مەملەكەتتىڭ 95- ءى وزدەرىنىڭ كوميسسارلارىن دا بەكىتىپ قويدى. بۇعان دەيىن ءبىزدىڭ نەگىزگى جۇمىسىمىز تازا قۇرىلىس سالاسىنا قاتىستى بولسا، ەندىگى ماسەلە قاتىسۋشى مەملەكەتتەر جانە كونتەنتتى قامتۋعا قاتىستى بولىپ وتىر»، - دەدى ا. ەسىموۆ.
استانادا وتەتىن «ەكسپو-2017» كورمەسى اياسىنداعى جۇمىستاردان 131 ميلليارد تەڭگە ۇنەمدەلدى.
«ەكسپو قۇرىلىسى اياسىنداعى جۇمىستاردى ءبىز بيۋدجەت قاراجاتتارىن ۇنەمدەپ جۇمساۋدى ءالى دە قاپەردە ۇستايتىن بولامىز. قازىردىڭ وزىندە حالىقارالىق كورمە بويىنشا 131 ميلليارد تەڭگە ۇنەمدەگەن ەدىك. جىل سوڭىنا دەيىن بۇل كورسەتكىش ءالى دە ارتادى دەپ ويلايمىن. سونىڭ ىشىندە «ەكسپو» نىساندارى قۇرىلىسى بويىنشا قاراجاتتى ۇنەمدەۋدى كوزدەيمىز. دەگەنمەن بۇل تۋرالى ناقتى جىلدىڭ اياعىنا تامان بەلگىلى بولادى. دەگەنمەن، ءبىر انىعى بۇعان دەيىن ۇنەمدەلگەن 131 ملرد تەڭگە ايتارلىقتاي ەسەلەنەدى»، - دەدى ا. ەسىموۆ.
ءسوز اراسىندا ۇلتتىق كومپانيا باسشىسى «ەكسپو-2017» حالىقارالىق كورمەسىن ناعىز داعدارىسقا قارسى جوبا بولعانىن اتاپ ءوتتى. ونىڭ ايتۋىنشا، ەكسپو ارقاسىندا بىلتىردىڭ وزىندە 296 وتاندىق كومپانيا اۋقىمدى جوبالاردى جۇزەگە اسىرۋعا قاتىسقان.
«ەكىنشىدەن، ەكسپو ارقاسىندا جۇمىسپەن قامتۋ دا ءتيىستى دەڭگەيدە ەلدەگى جاعدايعا وڭ اسەرىن تيگىزدى. ماسەلەن، كورمە قۇرىلىسى مەن ونىڭ اياسىنداعى جۇمىستار بويىنشا استانانىڭ وزىندە جانە وڭىرلەردە 46 مىڭنان استام جۇمىس ورنى اشىلدى. بۇل داعدارىس كەزەڭىندە ەڭ ماڭىزدى ماسەلە بولاتىن»، - دەدى ا. ەسىموۆ.
