پرەزيدەنت زەينەتاقى مەن جاردەماقىلاردى قاجەتتى دەڭگەيدە قامتاماسىز ەتۋدى تاپسىردى
ءۇش جىلدىق مەرزىمگە رەسپۋبليكالىق تۋرالى زاڭ جوباسىن قاراستىرىپ، قابىلداۋ جۇمىسى بار ەكەنىنە توقتالعان مەملەكەت باسشىسى، وندا جاھاندىق تاۋەكەلدەر ءۇردىسىن ەسكەرە وتىرىپ 2017-2019 -جىلدارعا ارنالعان بيۋدجەتتىك ساياساتتىڭ ۇستانىمدارى مەن قادامدارى ايقىندالاتىنىن اتاپ ءوتتى.
سونىمەن قاتار پرەزيدەنت مەملەكەت تاراپىنان كەپىلدەندىرىلگەن الەۋمەتتىك پاكەتكە شىعىستار كولەمىن ساقتاۋدى زاڭنامالىق تۇرعىدا قامتاماسىز ەتۋ كەرەك ەكەنىن قاداپ ايتتى.
«بۇل رەتتە بارىنەن بۇرىن زەينەتاقى، جاردەماقىلارعا، شاكىرتاقىلارعا جانە ادامدار ءۇشىن باسقا دا الەۋمەتتىك تولەمدەرگە قاتىستى بولىپ وتىر. قازاقستاندىقتار ءومىر ءسۇرۋ دەڭگەيىنىڭ تومەندەۋىنە ەشبىر جاعدايدا جول بەرمەۋ ءۇشىن بيۋدجەتتىك ساياساتتى ءتيىستى دارەجەدە باعدارلاۋ قاجەت»، - دەپ تاپسىردى ن. نازاربايەۆ.
جيىندى اشۋ بارىسىندا ەلباسى تاۋەلسىزدىكتىڭ شيرەك عاسىرىندا اتقارىلعان ىستەرگە توقتالىپ، پارلامەنتتىڭ ەكىنشى سەسسياسى جاۋاپتى تاريحي ساتتە ىسكە كىرىسىپ وتىرعانىن جەتكىزدى.
«بىرىنشىدەن، قازاقستان تاۋەلسىزدىكتىڭ 25 جىلدىق مەرەيتويىن قارسى الۋعا دايىندالىپ جاتىر. بۇل جىلدىڭ باستى وقيعاسى، بۇل توي تويلايتىن عانا كەزەڭ ەمەس، حالىققا ەلدىڭ جەتىستىكتەرىن تولىق تۇسىندىرەتىن كەزەڭ. شيرەك عاسىر ىشىندە ءجۇز جىلعا تاتيتىن قىرۋار شارالار اتقارىلدى. مەنىڭ ويىمشا، حالىققا ايتارىمىز دا از ەمەس. وسى مەرەيتويعا ارنالعان شارالار قازىردەن باستالۋى ءتيىس. ال ول مەرەيتويدىڭ ءوزى قورىتىندى جاسايتىن شاق بولۋى كەرەك. ءاربىر قازاقستاندىق، ءاربىر اۋىل تۇرعىنى ەلدەگى يگىلىكتى سەزىنىپ، بولاشاق باعداردى ءتۇسىنۋى كەرەك»، - دەدى ن. نازاربايەۆ.
سونىمەن قاتار، ەلباسى قازاقستاندا جاڭعىرۋدىڭ جاڭا كەزەڭى جۇرگىزىلىپ جاتقانىن ەسكە سالا كەلە، پارلامەنتكە ۇكىمەتپەن سىندارلى جۇمىستى جالعاستىرۋدى تاپسىردى. «جاڭا زاڭداردى ازىرلەۋ مەن قابىلداۋعا قاتىستى بارلىق ماسەلەلەر بويىنشا ۇكىمەتپەن تىعىز، ورنىقتى جۇمىس جاساۋ قاجەت. بۇل رەتتە زاڭدى ازىرلەۋدە ءبىرىنشى كەزەكتە ونى حالىققا تۇسىندىرۋگە ءتيىسپىز. ەشكىمگە دە تۇسىنىكسىز جاڭالىقتار ەنگىزۋدەن قاشۋ كەرەك، وتكەن كۇننىڭ جاعىمسىز تاجىريبەسىن ەستەن شىعارماۋ كەرەك. بۇل رەتتە ءماجىلىس پەن سەنات دەپۋتاتتارىنىڭ حالىققا قولجەتىمدى تۇردە زاڭدى تۇسىندىرۋدەگى ءرولىن كۇشەيتكەن ماڭىزدى. ەگەر كەز كەلگەن زاڭدى الىپ قاراساق، ول حالىق ءۇشىن اسا ماڭىزدى ءبىر ماسەلەنى شەشۋگە نەگىزدەلەدى»، - دەدى ن. نازاربايەۆ.
اۆتور: قانات مامەتقازى ۇلى
