ق ر پرەزيدەنتى پارلامەنتكە زاڭنىڭ ساپاسىنا قاتىستى ەسكەرتۋ جاسادى

استانا. قازاقپارات - بۇگىن التىنشى سايلانعان ق ر پارلامەنتىنىڭ ەكىنشى سەسسياسىن اشۋ بارىسىندا ءسوز سويلەگەن ق ر پرەزيدەنتى نۇرسۇلتان نازاربايەۆ پارلامەنتتىڭ الداعى جۇمىسىنا سەنىم بىلدىرە وتىرىپ، زاڭ ساپاسىنا قاتىستى ەسكەرتۋ جاسادى.

«بيىلعى سەسسيا قاستەرلى تاۋەلسىزدىگىمىزدىڭ 25 جىلدىعىن تويلايتىن كەزەڭگە ساي كەلىپ وتىر. قازىر الەمدە اسا كۇردەلى كەزەڭدەردىڭ ءبىرىن باستان كەشىپ وتىرمىز. شەكارا تالعامايتىن تەرروريزم مەن ەكسترەميزم دۇنيەنىڭ بارلىق قىرىن شارلاپ كەلەدى. مۇنىڭ ءبارى جاھاندىق الەمنىڭ اجىراماس بولىگى قازاقستانعا دا ىقپالىن تيگىزبەي قويمايدى. سوعان قاراماستان، ءبىز زاماننىڭ سىندارلى بارلىق قاتەرىنە جاۋاپ بەرۋ ءۇشىن زور قىزمەتتەر اتقارىپ كەلە جاتىرمىز. ەلىمىز تاۋەلسىزدىك تاريحىنىڭ ەكىنشى شيرەگىن تىڭ قارقىنمەن باستايدى دەپ سەنەمىن»، - دەدى سەسسيانى اشقان ن. نازاربايەۆ.

بۇل رەتتە ەلباسى ەلىمىزدىڭ «قازاقستان2050» ستراتەگياسىندا كوزدەلگەن ماقساتتارعا ۇزدىكسىز ۇمتىلاتىنىن اتاپ ءوتتى. سونىمەن قاتار، پرەزيدەنت الدا ۇلكەن مىندەتتەر مەن اۋقىمدى جۇمىستار كۇتىپ تۇرعانىن، بۇل ورايدا پارلامەنتكە دە زور جاۋاپكەرشىلىك جۇكتەلەتىنىن ايتتى.

 «بەس ينستيۋتتتىق رەفورمانىڭ جۇزەگە اسىرىلۋى، ۇلت جوسپارىنىڭ انىقتامالىعى قارقىندى تۇردە جالعاسۋى قاجەت. بىلتىرعى جاڭا رەفورمالاردى جالعاستىرىپ، سوزبەن ەمەس ىسپەن جۇمىس ىستەيتىنىمىزدى الەمگە دالەلدەۋگە ءتيىسپىز. كاسىبي پارلامەنت وزىنە جۇكتەلگەن تاريحي مىندەتتىڭ ابىرويمەن اتقاراتىنىنا سەنەمىن. دەگەنمەن، كەزەك كۇتتىرمەيتىن زاڭدار دەپ، بىلتىرعىداي زاڭنىڭ ساپاسىن جوعالتىپ المايىق. وسى ەستەرىڭىزدە بولسىن»، - دەدى ن. نازاربايەۆ.

اۆتور: قانات مامەتقازى ۇلى