ق ر پرەزيدەنتى استاناداعى حورەوگرافيا اكادەمياسىنا ۇلتتىق جوعارى وقۋ ورنى مارتەبەسىن بەردى

استانا. قازاقپارات - ق ر پرەزيدەنتى نۇرسۇلتان نازاربايەۆ استانادا قازاقستاننىڭ ۇلتتىق حورەوگرافيا اكادەمياسىنىڭ اشىلۋىنا قاتىستى، دەپ حابارلايدى قازاقپارات ءتىلشىسى.

«بارشاڭىزدى جاڭا ونەر ورداسى - قازاقستاننىڭ ۇلتتىق حورەوگرافيا اكادەمياسىنىڭ قۇرىلىسىنىڭ اياقتالۋىمەن شىن جۇرەگىممەن قۇتتىقتايمىن. بۇل ەلوردامىزدىڭ تاعى دا ءبىر كەرەمەت عيماراتى، تەڭدەسى تەك قانا ءبىزدىڭ ەلوردامىزدا عانا ەمەس، بارشا ورتالىق ازيا ەلدەرىندە جوق عيمارات بولىپ سانالادى. بۇل تاۋەلسىزدىگىمىزدىڭ 25 جىلدىعىنا مەرەكەمىزگە ارنالعان قازاقستانىمىزعا تارتۋ بولىپ وتىر. ءبىلىم ورداسى ەلوردامىزدىڭ ساۋلەتىمەن ۇيلەسىمدى سالىنعانىن كورىپ وتىرسىزدار. حورەوگرافيا اكادەمياسى وتاندىق ءبي ونەرىنىڭ قارا شاڭىراعى بولاتىنىنا سەنەمىن. مۇندا دارىندى ۇرپاقتىڭ ءبىلىم الۋى ءۇشىن بارلىق جاعداي جاسالعان. ساباق الاتىن، ۇيرەنەتىن بي ونەرىنىڭ كلاستارى ءوز الدىنا، جاتاقحانالارى بار، مۇعالىمدەرگە، ستۋدەنتتەرگە جاتاتىن ورىن بار»، - دەدى ەلباسى.

پرەزيدەنتتىڭ اتاپ وتۋىنشە، اكادەميا ۇلتتىق جوعارى وقۋ ورنى مارتەبەسىن الىپ وتىر. مەملەكەت باسشىسى، سونىمەن قاتار، بۇل ءبىلىم ورداسىنىڭ قۇرىلىسى بيۋدجەتتىك ەمەس قاراجاتتارعا سالىنعاندىعىن اتاپ ءوتتى.

«مەملەكەتتىڭ مەرەيى رۋحانيات ونەرىنىڭ دەڭگەيىمەن دە كورىنىپ تۇرۋى كەرەك. بۇل رەتتە اكادەمياعا زور سەنىم ارتىلادى. وسىنى ەسكەرە كەلە، ءبىلىم وشاعىنا ارنايى ۇلتتىق جوعارى وقۋ ورنى مارتەبەسىن بەردىك. استانا وپەرا تەاترى اشىلدى. الماتىدا اباي اتىنداعى اكادەميالىق وپەرا- بالەت تەاترى بار. شىمكەنتتە وپەرا- بالەت تەاترى بار. بىرنەشە قازاقستاندىق ءبي انسامبلدەرى بار. سولاردىڭ بارلىعىنا مامان دايىندايتىن، بۇكىل 1-سىنىپتان باستاپ، جوعارى ءبىلىم الاتىن، دوكتورانتۋراسىن ءبىتىرىپ شىعاتىن مۇنداي مەكتەپ ەش جەردە جوق. بۇنداي مەكتەپتى تەك اۋقاتتى، كۇشتى مەملەكەت سالادى. جاعداي جاقسى مەملەكەتتە ەلدىڭ، حالىقتىڭ ونەرگە دەگەن ىنتاسى كوبەيەدى. سول كەزدە عانا سالىنادى مۇنداي مەكتەپ. بۇل - ءجۇز جىلدا، مىڭ جىلدا سالىناتىن مەكتەپ. سوندىقتان وسىنىڭ بارلىعىن ءبىز قادىرلەي ءبىلۋىمىز كەرەك. وتاندىق مادەنيەتتىڭ جاڭارۋىنا مەملەكەت ءبىرىنشى كۇننەن باستاپ كوڭىل ءبولىپ كەلە جاتقاندىعىن بىلەسىزدەر. ءبىز مادەنيەت جىلىن جاريالاپ، بۇكىل قازاقستاندا مادەنيەت وشاقتارىنىڭ بارلىعىن جاعىرتتىق. قايتادان ىسكە اسىردىق. جاڭادان تەاترلار اشىلدى. جاس دارىندى جاستاردىڭ مامان بولۋىپ شىعۋىنا بارلىق جاعداي جاساپ كەلەمىز. قازاقستاننىڭ قايتالانباس ونەرىن الەمدىك ساحناعا شىعارۋ ءۇشىن دايىندىق كەرەك، ارينە»، - دەپ ءتۇيدى ءسوزىن ن. نازاربايەۆ.

ق ر مادەنيەت جانە سپورت ءمينيسترى ارىستانبەك مۇحامەدي ۇلىنىڭ ايتۋىنشا، اتالمىش اكادەميا تابالدىرىعىن بۇگىن 498 تاربيەلەنۋشى العاش اتتاماق.

اۆتور: جاسۇلان جولدىبايەۆ