باقىتجان ساعىنتايەۆ: ۇلتتىق قوردىڭ يگەرىلمەگەن قاراجاتى قايتا بولىنەدى
استانا. قازاقپارات - ۇكىمەت ۇيىندە ق ر پرەمەر-ءمينيسترىنىڭ ءبىرىنشى ورىنباسارى باقىتجان ساعىنتايەۆ ۇلتتىق قور قاراجاتىن يگەرۋ ماسەلەلەرى بويىنشا سەلەكتورلىق كەڭەس وتكىزدى.
2016-جىلى ۇلتتىق قوردان تىكەلەي بيۋدجەتتىك قارجىلاندىرۋعا بولىنگەن ماقساتتى ترانسفەرتتەر 807,5 ميلليارد تەڭگەنى قۇراعان. 1- شىلدەدەگى ەسەپ بويىنشا بۇل سومادان 297 ميلليارد تەڭگە يگەرىلگەن نەمەسە جىلدىق جوسپاردىڭ %37 ورىندالعان، دەپ جازادى Pm.kz.
جيىن بارىسىندا ب. ساعىنتايەۆ پرەزيدەنت نۇرسۇلتان نازاربايەۆتىڭ ۇلتتىق قور قاراجاتىن جەرگىلىكتى جانە ورتالىق دەڭگەيدە يگەرۋ قارقىنىن سىنعا العانىن اتاپ ءوتتى.
پرەمەر-ءمينيستردىڭ ءبىرىنشى ورىنباسارى ءبىرىنشى جارتى جىلدىقتا ۇلتتىق قور قاراجاتىن كوپ يگەرمەگەن ايماقتار قاتارىندا الماتى قالاسى، وڭتۇستىك قازاقستان مەن الماتى وبلىستارى بار ەكەنىن حابارلادى.
جەكەلەگەن باعدارلامالار بويىنشا قاراجات يگەرىلمەي قالماۋ ءۇشىن ب. ساعىنتايەۆ رەسپۋبليكالىق بيۋدجەتتىك باعدارلامالار جەتەكشىلەرىنە، اكىمدىكتەرگە قاراجاتتى ءۇشىنشى توقساننان ءتورتىنشى توقسانعا بارىنشا اۋىستىرۋدى، سونداي- اق بايقاۋ راسىمدەرىن قىركۇيەككە دەيىن اياقتاۋدى تاپسىردى. قاراجاتتى تولىقتاي ءارى ءتيىمدى يگەرۋ ءۇشىن كوش سوڭىنداعى ايماقتار قاراجاتى بەلسەندى جۇزەگە اسىرىلىپ جاتقان جوبالارعا قايتا بولىنەدى.
بۇدان بولەك ورتالىق مەملەكەتتىك ورگاندارعا، اكىمدىكتەر مەن ۇلتتىق حولدينگتەرگە ۇلتتىق قور قاراجاتىن ماقساتتى ءارى ءتيىمدى پايدالانىلۋىن قامتاماسىز ەتۋ تاپسىرىلدى.
