ق ر ىشكى ىستەر ءمينيسترى الماتىدا اتىس جاساعان لاڭكەستىڭ بۇل ارەكەتكە نە سەبەپتى بارعانىن مالىمدەدى
بۇل تۋرالى الماتىدا وتكەن بريفينگ بارىسىندا ق ر ىشكى ىستەر ءمينيسترى قالمۇحانبەت قاسىموۆ ءمالىم ەتتى.
مينيستر الدىمەن، قازا تاپقان ازاماتتاردىڭ تۋعان- تۋىستارىنا قايعىرىپ كوڭىل ايتىپ، كەيىن قاندى وقيعانىڭ قالاي وربىگەنىن بايانداپ بەردى.
«1990 -جىلى تۋعان رۋسلان كۋليكبايەۆ بۇعان دەيىن ەكى رەت سوتتالعان. 2010 -جىلى توناۋشىلىق ارەكەت جاساعانى ءۇشىن، ال 2012 -جىلى اتىس قارۋىن زاڭسىز ساقتاعانى ءۇشىن سوتتالدى. جالپى، تۇرمەدە 5 جىل 11 اي وتىرعان. ءبىراق، وكىنىشكە قاراي، تۇزەلىپ شىقپادى. سودان، بيىل قاڭتار ايىندا الماتىعا كەلىپ، جالعا العان پاتەرلەردە تۇرىپ كەلگەن. ءسويتىپ ءجۇرىپ، قىلمىس جاساۋ ماقساتىمەن زاڭسىز 5,6 م م. ءيىر ويىقتى اتىس قارۋىن ساتىپ الادى. بۇدان سوڭ، 17 -شىلدەدەن 18 -شىلدەگە قاراعان ءتۇنى، تۇنگى ساعات 3:52 دە ءبىر قوناق ءۇيدىڭ قاسىنا كەلەدى. ءسويتىپ، جەك كورۋشىلىك پيعىلمەن وزبەكستان ازاماتشاسىن اتىپ ولتىرەدى. تەرگەۋ بارىسىندا ول ونى جەزوكشەلىگى ءۇشىن اتقانىن مالىمدەدى. كەيىن، قوناق ءۇي ماڭىندا اۆتوكولىك يەسىن قارۋمەن قورقىتىپ، ونىڭ كولىگىن يەمدەنىپ، وقيعا ورنىنان ءىز جاسىرادى. الايدا، ول ءوزىنىڭ ۇستالاتىنىن بىلەدى. سودان، تۇرمەدە وتىرعانى ءۇشىن قۇقىق قورعاۋ ورگاندارى قىزمەتكەرلەرىنەن كەك الۋدى ۇيعارعان.
ءسويتىپ، بۇگىن 10 ساعات 54 مينۋتتا المالى اۋداندىق ىشكى ىستەر باسقارماسىنا كەلىپ، ىشكە ەنەدى. پوستىدا تۇرعان پوليتسيا قىزمەتكەرى ودان قۇجاتىن كورسەتۋدى تالاپ ەتەدى. وسى ساتتە قىلمىسكەر تاپانشاسىن سۋىرىپ الىپ، پوليتسيا قىزمەتكەرىنىڭ باسىنان جانە ىشىنەن اتادى. پوليتسيا قىزمەتكەرى وتە اۋىر جاراقات الادى. وسىدان كەيىن قىلمىسكەر ونىڭ اۆتوماتىن يەمدەنىپ سونداعى پوليتسيا قىزمەتكەرلەرىنە قاراتا وق جاۋدىرادى. ءۇش پوليتسيا قىزمەتكەرىن جانە ءبىر ازاماتتىق تۇلعانى جاراقاتتايدى. كەيىن، دالاعا جۇگىرىپ شىعىپ، كوشەدە ءوتىپ بارا جاتقان اۆتوكولىكتى توقتاتىپ، جۇرگىزۋشىگە قارۋ كەزەنىپ، ونى ق ر ۇ ق ك الماتى قالاسى بويىنشا دەپارتامەنتىنە قاراي جۇرۋگە ماجبۇرلەيدى. جولدا، قاسىنان ءوتىپ بارا جاتقان پاترۋلدىك ماشينانى كورىپ قالادى. سول ارادا اۆتوماتتان وق اتىپ، ماشيناداعى ەكى پوليتسيا قىزمەتكەرىن جاراقاتتايدى.
ۇ ق ك دەپارتامەنتىنە كەلگەن سوڭ، قىلمىسكەر جول جيەگىندەگى پوليتسيا اۆتوماشيناسىن كورەدى. سول ارادا ماشينادان شىعادى دا، وندا وتىرعان پوليتسيا قىزمەتكەرلەرىنە وق جاۋدىرادى. سونىڭ سالدارىنان ءبىر پوليتسيا قىزمەتكەرى اۋىر جاراقات الىپ، ەكىنشىسى تيگەن وقتان وقيعا ورنىندا قازا تاپتى.
وسى ساتتە ۇ ق ك دەپارتامەنتىنىڭ كەزەكشىسى وعان قاراپ وق جاۋدىرادى. اتىس بارىسىندا قىلمىسكەردى الىپ كەلگەن، جۇرگىزۋشى وقيعا ورنىنان قاشىپ قۇتىلعان. ال قىلمىسكەر ءارى قاراي جۇگىرىپ، ىشىندە شەكارا قىزمەتىنىڭ اسكەري قىزمەتشىسى، اعا لەيتەنانتتى كورىپ، ونىڭ ماشيناسىن تارتىپ الۋعا ارەكەت جاسايدى. مۇنىسىنان تۇك شىقپاعان سوڭ، شەكارا قىزمەتكەرىنە قارسى وق اتىپ، ونى سول جەردە ءولىمشى ەتىپ جارالايدى. وسى ساتتە سول جەردەن ءوتىپ بارا جاتقان ازاماتتىق تۇلعانى دا جاراقاتتايدى. العان جاراقاتتان قالا تۇرعىنى كوز جۇمدى. بۇدان كەيىن، سول جەردەن لادا اۆتوكولىگىن كورەدى. جۇرگىزۋشىسىن ماشيناعا وتىرعىزىپ، وعان قارۋ كەزەنىپ، قالا ورتالىعىنا قاراي جۇرۋگە ماجبۇرلەيدى. ماشينا شەۆچەنكو كوشەسىمەن ابىلاي حان داڭعىلىنا دەيىن بارىپ، سولتۇستىك باعىتقا قاراپ جۇرگەن. جۇرگىزۋشى جولدا ادەيى باعدارشامنىڭ قىزىل تۇسىنە ءوتىپ كەتەدى. مۇنى بايقاعان جول پوليتسەيلەرى ماشينانىڭ سوڭىنا تۇسەدى. الايدا كولىك جۇرگىزۋشىسى امالسىز توقتاماي ايداۋعا ءماجبۇر بولادى.
پاترۋلدىك ماشينا قىلمىسكەر مىنگەن كولىكتى ابىلاي حان - تولە ءبي كوشەسى ماڭىندا جول جيەگىنە تىقسىرىپ توقتاتادى. وسى ساتتە كولىكتەن شىققان كۋليكبايەۆ پوليتسيا قىزمەتكەرلەرىنە قاراي وق اتادى. سول جەردە ءبىر پوليتسيا قىزمەتكەرى ءولىمشى بولىپ جاراقات الدى. بۇدان ءارى قىلمىسكەر ابىلاي حان داڭعىلىمەن تومەن قاراي قاشقان. وسى ساتتە المالى اۋدانى بويىنشا مەملەكەتتىك كىرىستەر دەپارتامەنتىندە كۇزەتتە بولعان «كۇزەت» مامانداندىرىلعان كۇزەت قىزمەتىنىڭ قىزمەتكەرى ونى بايقاپ قالادى.
ول سەرىكتەسىنە پوليتسياعا حابار بەرۋىن سۇراپ، ءوزى قىلمىسكەردىڭ ىزىنە تۇسەدى. ەكەۋىنىڭ اراسىندا اتىس باستالادى. سونىڭ سالدارىنان «كۇزەت» قىزمەتكەرى قىلمىسكەردى ءتورت جەرىنەن جاراقاتتاپ، ءوزى باسىنان ءولىمشى بولىپ جاراقات الدى. وسى ساتتە ەكىنشى پوليتسيا قىزمەتكەرى جۇگىرىپ جەتىپ، قىلمىسكەردى ۇستاپ، قولىنا كىسەن سالادى. ال اتىس كەزىندە اۆتوكولىك جۇرگىزۋشىسى دە قاشىپ كەتەدى. الايدا، ونى كۋاگەرلەر قىلمىسكەردىڭ سىبايلاسى دەپ ويلاپ قالعان. ول ۇستالدى. ودان كۋاگەر رەتىندە جاۋاپ الىندى.
قازىر بارلىق كۋاگەرلەردەن الدىن الا جاۋاپ الىندى. وسىلايشا، وقيعانىڭ ءمان- جايى انىقتالدى. ءتورت جەرىنەن جاراقات العان قىلمىسكەرگە وتا جاسالدى. قازىر دارىگەرلەردىڭ رۇقساتىمەن جانە ادۆوكاتتىڭ قاتىسۋىمەن ودان جاۋاپ الىنىپ جاتىر. بۇل قاندى وقيعا 25 مينۋتقا سوزىلدى. 10 ساعات 54 مينۋتتا ول المالى اۋداندىق ىشكى ىستەر باسقارماسىنا كىرگەن. ال 11 ساعات 19 مينۋتتا ۇستالدى. ءبىر ايتا كەتەرىم، ەشبىر پوليتسيا قىزمەتكەرى ونى ۇستاۋ بارىسىندا سەسكەنۋشىلىك تانىتپادى»، - دەدى ق. قاسىموۆ.
سونىمەن قاتار، مينيستر ءسوز سوڭىندا جاراقاتتانعاندار مەن قازا تاپقان پوليتسيا قىزمەتكەرلەرىنىڭ وتباسىلارىنا ءتيىستى ماتەريالدىق كومەك كورسەتىلەتىندىگىن ايتتى.
ايتا كەتەلىك، قاندى وقيعا ق ر قىلمىستىق كودەكسىنىڭ «لاڭكەستىك»، «بيلىك وكىلىنە قارسىلىق كورسەتۋ» جانە «مەملەكەتتىك نىساندارعا شابۋىل جاساۋ» باپتارى بويىنشا قارالۋدا.
اۆتور: ايبوتا جاپپاربەرگەن
