ءماجىلىس دەپۋتاتتارى اقتوبەدەگى تەراكتى قۇرباندارىن ەسكە الدى
«ق ر پرەزيدەنتىنىڭ وكىمىمەن اقتوبەدەگى تەرروريستىك اكتىنىڭ سالدارىنان ادامداردىڭ قۇربان بولۋىنا بايلانىستى 9 ماۋسىم ۇلتتىق ازا تۇتۋ كۇنى رەتىندە جاريالاندى. وسىعان بايلانىستى، «نۇر وتان» پارتياسى فراكسياسىنىڭ كەڭەيتىلگەن جينالىسىن باستاماس بۇرىن ءماجىلىس دەپۋتاتتارىنا، باسقا دا قاتىسۋشىلارعا تەرروريستىك اكتى قۇرباندارىن ءبىر مينۋتتىق ەسكە الۋدى ۇسىنامىن»، - دەدى وتىرىستى اشقان فراكسيا جەتەكشىسى، ءماجىلىس ۆيتسە-سپيكەرى گۇلميرا يسىمبايەۆا.
ەسكە سالايىق، مەملەكەت باسشىسى نۇرسۇلتان نازاربايەۆ اقتوبە قالاسىندا جاسالعان تەرروريستىك اكتىنىڭ سالدارىنان ادامداردىڭ قۇربان بولۋىنا بايلانىستى قازاقستان رەسپۋبليكاسىندا جالپى ۇلتتىق ازا تۇتۋ جاريالاۋ تۋرالى وكىم شىعارعان بولاتىن.
«مەن قايتىس بولعانداردىڭ وتباسىلارىنا، تۋىس- تۋعاندارىنا شىن جۇرەگىممەن قايعىرىپ كوڭىل ايتامىن. قازا تاپقان اسكەري قىزمەتكەرلەر وتان الدىنداعى انتىنا ادال بولىپ، ەل قاۋىپسىزدىگى جولىندا وشپەس ەرلىك كورسەتتى. ولاردىڭ ەرلىكتەرى مەملەكەت تاراپىنان لايىقتى باعالاناتىن بولادى. ونىڭ ۇستىنە 4 ازامات قايتىس بولدى، ءبارى اقتوبەنىڭ تۇرعىندارى. سوندىقتان، مەن بەيسەنبى، 9 ماۋسىم كۇنىن جالپىۇلتتىق ازا تۇتۋ كۇنى دەپ جاريالايمىن. قازا بولعانداردىڭ ارتىندا وتباسى، بالا- شاعالارى قالدى. مەنىڭ تاپسىرمام بويىنشا، ولارعا بارلىق قاجەتتى كومەكتەر جاسالۋدا»، - دەدى ەلباسى.
اۆتور: قانات مامەتقازى ۇلى
