جەر رەفورماسى جونىندە قوعامعا اقپاراتتار دۇرىس جەتكىزىلمەي جاتىر - م. ابەنوۆ
بۇگىن استاناداعى ۇلتتىق مۋزەيدە جەر رەفورماسى جونىندەگى رەسپۋبليكالىق كوميسسيانىڭ ءۇشىنشى وتىرىسىندا اقپاراتتىق ءتۇسىندىرۋ جۇمىس توبىنىڭ جەتەكشىسى مۇرات ابەنوۆ وسىلاي ءمالىم ەتتى.
«ءبىزدىڭ ازاماتتارىمىزدى كوبىرەك تولعاندىراتىنى شەتەلدىكتەرگە جەر ساتۋ مەن جالعا بەرۋ عانا سەكىلدى. الايدا، جەر رەفورماسىنا قاتىستى قازاقستان ازاماتتارىنا جەر بەرۋ، ونى ءتيىمدى پايدالانۋ ماسەلەسى دە، قولجەتىمدىلىگىن ىسكە اسىرۋ ماسەلەسى دە ازىرشە تالقىلانىپ جاتقان جوق. سونىمەن قاتار، جالپى جەر رەفورماسىنا قاتىستى ايتار بولساق، ازىرشە قوعامدا بۇل تۋرالى اقپارات دۇرىس جەتپەي جاتىر دەپ مالىمدەي الامىز»، دەدى م. ابەنوۆ.
ونىڭ ايتۋىنا قاراعاندا، اقپارات حالىققا جەتىمدى بولۋى ءۇشىن وڭىرلەرگە كوشپەلى وتىرىستار ۇيىمداستىرۋدىڭ ماڭىزى زور. بۇل رەتتە جۇمىس توبىنىڭ جەتەكشىسى كوميسسيا ەلگە بارار الدىندا حالىق تاراپىنان كوتەرىلىپ جۇرگەن سۇراقتارعا ناقتى جاۋاپ بەرۋگە دە ءازىر بولۋى كەرەكتىگىن، ول ءۇشىن مەملەكەتتىك ورگاندار كوتەرىلگەن سۇراقتار تۋرالى تولىق اقپارات ۇسىنۋى كەرەكتىگىن اتاپ ءوتتى.
«سوندىقتان دا، تالداۋلار بويىنشا كوميسسيا مۇشەلەرىنە تولىق اقپاراتتار بەرىلۋى كەرەك. بۇدان بولەك، ب ا ق قاتىستى ۇسىنىستار بولدى. جەر كودەكسىنىڭ پوزيتسياسىن عانا ەمەس، باسقا دا اقپاراتتار باسپا سوزدە بەرىلىپ تۇرۋى كەرەك. كوميسسيا مۇشەسى ب ا ق شىعامىن دەسە، ءوز ويىمدى تولىق جەتكىزەمىن دەسە، وعان مۇمكىندىك بەرىلۋى كەرەك»، دەدى م. ابەنوۆ.
اۆتور: قانات مامەتقازى ۇلى
