شەتتەن كەلگەن قانداستارىمىزدىڭ دا جەر ساتىپ الۋ قۇقىعىن شەكتەمەۋىمىز كەرەك - س. ماناتوۆ
بۇل تۋرالى بۇگىن جەر رەفورماسى بويىنشا كوميسسيانىڭ ەكىنشى وتىرىسىندا «مانات» شارۋا قوجالىعىنىڭ باسشىسى ساحا ماناتوۆ ءمالىم ەتتى.
«جەردىڭ قادىرىن تەك قانا جەرمەن اينالىساتىن ازامات بىلەدى. مەنى اگروسالاسىندا جۇرگەنىمە ءبىراز جىل بولدى. سول سەبەپتى جالعا بەرىلگەن جەرلەردى قازاقستان ازاماتتارىنىڭ ساتىپ الۋىنا مۇمكىندىك بەرۋ دۇرىس دەپ ەسەپتەيمىن. بىزگە قازىر جەردىڭ رەفورماسى قاجەت. جەكە مەنشىك بولسا، جەردىڭ سۇرانىسى ارتادى. قاجەتتىلىگى پايدا بولادى»، - دەدى ول.
ونىڭ اتاپ وتۋىنشە، جەردى قازاقستان ازاماتتارى ساتىپ السا، وندا ونى بانككە كەپىلدىككە قويۋى ارقىلى نەسيە الا الدى.
«تاعى ءبىر ماسەلە، مەن مۇحتار تايجاننىڭ سوزىنە قوسىلمايمىن. ول ءوز سوزىندە قازاقستاندا تۋىلماعان ازاماتتارعا جەر ساتىلماسىن دەگەن بولاتىن. مەن ءوزىم جامبىل وبلىسىنىڭ تۇرعىنىمىن، جامبىل وبلىسىندا 270 مىڭ قانداسىمىز تۇرادى. ياعني، قازاقستاندا دۇنيەگە كەلمەگەن قازاقتار. سوندا ءبىز، 270 مىڭ قانداسىمىزدىڭ قۇقىعىن شەكتەيمىز بە؟ وسى ماسەلەنى جاقسىلاپ قاراپ، دۇرىس شەشىم قابىلداۋىمىز كەرەك»، - دەدى س. ماناتوۆ.
م. تايجان قاتەلىك جىبەرگەنىن مويىنداپ، ءسوزىن قايتارىپ الاتىندىعىن ايتتى.
اۆتور: مارلان جيەمباي
