ن.نازاربايەۆ: ءبىز، پرەزيدەنت ساللمەن بىرگە قىتايدا وتەتىن ۇلكەن جيىرمالىقتىڭ كەزەكتى سامميتىنە قاتىساتىن بولامىز

استانا. قازاقپارات - قازاقستان مەن سەنەگال ۇستانىمدارىنىڭ جاقىندىعى كوپجاقتى قۇرىلىمدار اياسىنداعى ىنتىماقتاستىققا مۇمكىندىك بەرەدى.

بۇل تۋرالى بۇگىن اقوردادا سەنەگال پرەزيدەنتى ماكي ساللمەن كەزدەسۋىنەن كەيىن بىرلەسكەن مالىمدەمە جاساعان ق ر پرەزيدەنتى نۇرسۇلتان نازاربايەۆ ايتتى.

«بۇل - سەنەگال پرەزيدەنتىنىڭ ءبىزدىڭ ەلىمىزگە تۇڭعىش ساپارى. سوندىقتان كەزدەسۋىمىز بولاشاق قارىم-قاتىناسىمىزدىڭ باسى بولىپ سانالادى. افريكا قۇرلىعىمەن جاقىنداستىرا تۇسەتىن بۇل ساپاردىڭ ءبىزدىڭ ەلگە عانا ەمەس بۇكىل ءوڭىر ءۇشىن ءمان-ماعىناسى بار. قازاقستان مەن سەنەگال كەڭ اۋقىمدى ماسەلەلەر بويىنشا ءوزارا ءتيىمدى ءىس-قيمىل جاساي الادى دەپ سەنەمىن»، - دەدى ەلباسى.

مەملەكەت باسشىسى سەنەگال پرەزيدەنتىمەن كەزدەسۋ بارىسىندا بەلسەندى سۇحبات جۇرگىزىلگەنىن، بارلىق ساياسي جانە ەكونوميكالىق سالالار جونىندە پىكىر الماسىلعانىن باسا ايتتى.

«ۇستانىمىمىزدىڭ جاقىندىعى بىزگە كوپ جاقتى قۇرىلىمدار اياسىندا ىنتىماقتاسۋعا مۇمكىندىك بەرەدى. بيىلعى قىركۇيەكتە ءبىز، پرەزيدەنت ساللمەن بىرگە قىتايدا وتەتىن ۇلكەن جيىرمالىقتىڭ كەزەكتى سامميتىنە قاتىساتىن بولامىز. بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەلىگىنە قازاقستاننىڭ كانديداتۋراسىن بۇل ەل جاقتاپ وتىر. ول ءۇشىن ءبىز ريزاشىلىعىمىزدى بىلدىرەمىز»، - دەدى ن. نازاربايەۆ.

سونىمەن قاتار ق ر پرەزيدەنتى ەكى ەل اراسىندا اۋىل شارۋاشىلىعى، مۇناي-گاز، سپورت سالالارىنا قاتىستى كەلىسىمدەرگە قول قويىلعانىن اتاپ ءوتتى.

اۆتور: مارلان جيەمباي