قازاقستاندا كەدەندىك راسىمدەۋدىڭ جاڭا ايماقتارى سالىنادى
بۇل تۋرالى بۇگىن دۇنيەجۇزىلىك كەدەن ۇيىمىنىڭ ەۋروپالىق ءوڭىرىنىڭ كەدەندىك قىزمەتتەرى باسشىلارىنىڭ كونفەرەنتسياسىندا ق ر پرەمەر-ءمينيسترىنىڭ ءبىرىنشى ورىنباسارى باقىتجان ساعىنتايەۆ ءمالىم ەتتى.
وتكەن ايدىڭ سوڭىندا كەدەندىك اكىمشىلەۋدى جەڭىلدەتۋ بويىنشا پرەمەر-ءمينيستردىڭ بۇيرىعى شىققانىن ەسكە سالىپ وتكەن ول، ونىڭ اياسىندا ليتسەنزيا بەرۋ مەرزىمىن قىسقارتۋ، شەكارالىق باقىلاۋ ورگاندارى قىزمەتتەرىن وڭتايلاندىرۋ، سونداي-اق ۇدەرىستى اۆتوماتتاندىرۋ مەن اقپاراتتىق جۇيەلەردىڭ ينتەگراتسياسى قامتىلعان.
«ءبىز اتالعان ماسەلەدە ءتۇرلى ەلدەردىڭ الدىڭعى قاتارلى تاجىريبەسىن زەردەلەدىك جانە قازىرگى كەزدە كەدەندىك راسىمدەۋدىڭ جاڭا ايماقتارىن سالۋ بويىنشا قۇجاتناما دايىندالىپ جاتىر. ەگەر دە ءبىزدىڭ قازىرگى قولدانىستاعى نىساندارعا توقتالاتىن بولساق، ولار كەدەندىك ايماق ارقىلى تاۋارلاردىڭ جىلدام راسىمدەلىپ، وتكىزىلۋىنە ىقپال ەتپەي وتىر. سوندىقتان دا بۇل ماسەلەلەردىڭ بارلىعى تاۋارلاردى كەدەندىك ايقىنداۋ بويىنشا قىزمەتتەردىڭ تولىق شوعىرىن ۇسىنۋدى، ينفراقۇرىلىمدى جاقسارتۋدى، قۇرىلىستى، ونىڭ ىشىندە ساپالى اۆتوجولداردى قاراستىرادى»، - دەدى ب. ساعىنتايەۆ.
وسى رەتتە ول اقتاۋ پورتىندا كەدەندىك راسىمدەۋ ۋاقىتى 12-15 ساعىتتان 2 ساعاتقا دەيىن قىسقارعانىن ەسكە سالدى. سونىمەن قاتار بۇنداي جۇمىستار «قورعاس» كەدەندىك بەكەتىندە دە جۇرگىزىلەدى.
اۆتور: رۋسلان عابباسوۆ
