ن. نازاربايەۆ: و. سۇلەيمەنوۆ - بۇگىندە زيالى قاۋىم مەن جاستارىمىز ءۇشىن ۇلگى

استانا. قازاقپارات - ەلباسى نۇرسۇلتان نازاربايەۆ اقىن، قوعام قايراتكەرى ولجاس سۇلەيمەنوۆپەن كەزدەستى، دەپ حابارلادى اقوردانىڭ باسپا ءسوز قىزمەتىنەن.

نۇرسۇلتان نازاربايەۆ ولجاس سۇلەيمەنوۆتى 80 جىلدىق مەرەيتويىمەن قۇتتىقتاپ، ونىڭ وتاندىق زيالى قاۋىمنىڭ كورنەكتى وكىلى ەكەنىن اتاپ ءوتتى.

- ناعىز زيالى ءبىلىمدى عانا بولىپ قويماي، ەڭ باستىسى - قۋانىشتا دا، قيىن ساتتەردە دە ءاردايىم جۇرتپەن بىرگە بولىپ، ار-نامىستىڭ ۇلگىسىن كورسەتەدى، سول ارقىلى حالىق بىرلىگى مەن مەملەكەت قۋاتىن ساقتايدى. ءسىز «نيەۆادا-سەمەي» قوزعالىسىن باسقاردىڭىز جانە سەمەي يادرولىق پوليگونىن جابۋ ىسىندە زور كومەك كورسەتتىڭىز. كەيىنگى جىلدارى دا جەڭىل بولعان جوق. قازاقستان شەكاراسىنىڭ دەماركاتسياسىن جۇرگىزىپ، تاۋەلسىزدىگىن نىعايتۋ كەرەك بولدى. بۇل ىستە دە ءسىزدىڭ ۇلەسىڭىز بار. بۇگىندە زيالى قاۋىم وكىلدەرى مەن بۇكىل جاستارىمىز ءۇشىن ۇلگىسىز، - دەدى مەملەكەت باسشىسى.

كەزدەسۋ بارىسىندا نۇرسۇلتان نازاربايەۆ وتاندىق ادەبيەتتى دامىتۋعا ايرىقشا ۇلەس قوسقانى ءۇشىن، سونداي-اق تاتۋلىق پەن ازاماتتىق كەلىسىمدى نىعايتۋعا باعىتتالعان بەلسەندى قوعامدىق قىزمەتى ءۇشىن و. سۇلەيمەنوۆكە «قازاقستاننىڭ ەڭبەك ەرى» التىن جۇلدىزىن تاپسىردى.

مەملەكەت باسشىسى اقىنعا مىقتى دەنساۋلىق، وتباسى باقىتىن جانە شىعارماشىلىق تابىس تىلەدى.

و. سۇلەيمەنوۆ جوعارى اتاق بەرىلگەنى ءۇشىن العىسىن ءبىلدىردى جانە بۇل بۇكىل قازاقستان ادەبيەتىن قولداۋدىڭ كورسەتكىشى ەكەنىن ايتتى. ول سونداي-اق ءوز شىعارمالارىنىڭ بارلىعى حالىق پەن ەلدىڭ يگىلىگىن ارتتىرۋ نيەتىمەن جازىلعانىن ايتىپ، مەملەكەتىمىزگە باقىتتى بولاشاق تىلەدى.