م. قۇل- مۇحاممەد: جەر ماسەلەسىنە قاتىستى ورتاق شەشىم شىعاراتىن رەداكسيالىق كوميسسيا قۇرىلۋى قاجەت

استانا. قازاقپارات - جەر ماسەلەسىنە قاتىستى ورتاق شەشىم شىعاراتىن رەداكسيالىق كوميسسيا قۇرىلۋى قاجەت. جەر رەفورماسى بويىنشا كوميسسيانىڭ العاشقى وتىرىسىندا «نۇر وتان» پارتياسى ءتوراعاسىنىڭ ءبىرىنشى ورىنباسارى - اتالعان كوميسسيا ءتوراعاسىنىڭ ورىنباسارى مۇحتار قۇل- مۇحاممەد وسىلاي دەدى.

 «كوميسسيانىڭ قۇزىرەتىنە كەلەر بولساق، كوميسسيا قانداي دا بولماسىن ءبىر شەشىمدەر قابىلداسا، وندا ونىڭ بارلىعى حالىقتىڭ ۇسىنىسى رەتىندە قارالۋى كەرەك. ءبىز پارلامەنتتى وزگەرتە المايمىز. ءبىز قانداي وزگەرىستەر ەنگىزەتىن بولساق، ول ەرتەڭ پارلامەنتتىڭ الدىنا كەلەدى. پارلامەنتتى بۇكىل حالىق بولىپ سايلادى. سول جەردە تالقىلاناتىن بولادى. سوندىقتان مەن مىناۋ كوميسسيانىڭ ەڭ العاشقى وتىرىسى باستالعان كۇنى بەرەكە- بىرلىكپەن جۇمىس ىستەسەك دەيمىن»، - دەدى ول.

وسى رەتتە ول وتىرىستا ايتىلعان پىكىرلەردىڭ اراسىنداعى قاراما- قايشىلىق بولسا، ولاردى شەشۋ ءۇشىن ارنايى رەداكسيالىق كوميسسيا قۇرۋ قاجەتتىگىن اتاپ ءوتتى.

 «كەرەك دەسەڭىز 1991 -جىلدىڭ 16 - جەلتوقسان كۇنى قابىلدانعان تاۋەلسىزدىك تۋرالى كونستيتۋتسيالىق اتا زاڭىمىز 3 كۇن بويى تالقىلانىپ، كەلىسىمگە كەلە الماعان كەزدە، كوميسسيا قۇرىلعان. سول كوميسسيانىڭ اتىنان بايانداما جاسالعان. سودان كەيىن بارىپ، تاۋەلسىزدىگىمىزدى جاريالاعانبىز. ەگەر ورتاق پىكىرگە كەلە الماي جاتساق، وسىنداي كوميسسيا قۇرىپ، سونى كوميسسيانىڭ شەشۋشى وتىرىسىندا قاراپ، ءاربىر بابىن تالقىلاپ، ورتاق شەشىمگە كەلگەنىمىز دۇرىس دەپ ويلايمىن»، - دەدى م. قۇل- مۇحاممەد.

 اۆتور: مارلان جيەمباي