ماجىلىستەگى قازاقستان حالقى اسسامبلەياسى دەپۋتاتتارى بەس جۇمىس توبىن قۇردى
جيىن بارىسىندا ءماجىلىس ۆيتسە-سپيكەرى ۆلاديمير بوجكو ق ح ا 24- سەسسياسىندا «ماڭگىلىك ەل» پاتريوتتىق اكتىسى قابىلدانعانىن اتاپ ءوتىپ، ونىڭ تاريحي ماڭىزدىلىعىنا دا توقتالدى. ۆيتسە-سپيكەردىڭ پايىمىنشا، «ماڭگىلىك ەل» پاتريوتتىق اكتىسىندە بەلگىلەگەن باعىتتار ناقتى تۇجىرىمدالعان ۇلتتىق يدەيا بولىپ تابىلادى.
«ءبىزدىڭ باستى مىندەتىمىز - ۇلتتىق يدەيانىڭ ماڭىزىن ەلىمىزدىڭ ءاربىر ازاماتىنا ءتۇسىندىرۋ، ونى جۇزەگە اسىرۋ ءۇشىن جاعدايلار جاساۋ. سونىمەن قاتار، «100 ناقتى قادام» ۇلت جوسپارىندا ايقىندالعان بەس ينستيتۋتسيونالدىق رەفورمانى ىسكە اسىرۋ بويىنشا دەپۋتاتتار قاتىساتىن جەكەلەگەن توپتار قۇرۋ تۋرالى ۇسىنىس جاسالدى»، - دەدى ۆ. بوجكو. وسىعان بايلانىستى، بەس جۇمىس توبى قۇرىلىپ، جەتەكشىلەرى تاعايىندالدى. اتاپ ايتقاندا، «ۇلكەن ەل - ۇلكەن وتباسى» توبىنا دەپۋتات اباي تاسبولاتوۆ جەتەكشىلىك ەتىپ، ونىڭ قۇرامىنا احمەت مۇرادوۆ، گالينا بايماحانوۆا، يۆان كليمەنكو جانە ولگا شيشيگينا ەنىپ وتىر. «بولاشاعى ءبىرتۇتاس ۇلت» دەپۋتاتتىق توبىنا دەپۋتات سەرگەي دياچەنكو باسشىلىق جاسايدى، قۇرامىنا نارينە ميكاەليان، نۇرلان دۋلاتبەكوۆ، ەرجان قۇدايبەرگەن، سنەجاننا يماشيەۆا جانە ماگەررام ماگەرراموۆ كىرىپ وتىر. ال «مەنىڭ ەلىم» ازاماتتىق بىرتەكتىلىك» توبىن دەپۋتات ماۋلەت اشىمبايەۆ باسقارادى، ونىڭ قۇرامىندا دەپۋتات رومان كيم، باقىتجان ءابدىرايىم، سۆەتلانا بىچكوۆا، ۆاسيلي ولەينيكتەر بار.
«ءۇش تىلدىلىكتى دامىتۋ ۇلتتىق جوباسى» توبىنا دەپۋتات انار جايىلعانوۆا جەتەكشىلىك ەتسە، قۇرامىنا - شايماردان نۇرىموۆ، فاحريددين قاراتايەۆ، ايقىن قونىروۆ، بەيبىت مامرايەۆ ەندى.
«نۇرلى بولاشاق» اتتى دەپۋتاتتىق توپتى ەرسۇلتان بەكتۇرعانوۆ باسقارسا، قۇرامىنا شاكىر حاحازوۆ، سەرگەي زۆولسكي، مەرۋەرت قازىبەكوۆا، ەكاتەرينا نيكيتينسكايالار كىرىپ وتىر.
اۆتور: قانات مامەتقازى ۇلى
