ن. نازاربايەۆ ب. وباماعا اتوم جوباسى ەلشىسىنىڭ كارتيناسىن سىيعا تارتتى

استانا. قازاقپارات - ق ر پرەزيدەنتىنىڭ باسپا ءسوز حاتشىسى داۋرەن ابايەۆ اقوردانىڭ فەيسبۋكتەگى رەسمي پاراقشاسىندا ۆاشينگتوندا وتكەن يادرولىق قاۋىپسىزدىك جونىندەگى سامميت تۋرالى ايتىپ بەردى.

«تاياۋدا عانا ۆاشينگتوندا نۇرسۇلتان نازاربايەۆ قاتىسقان يادرولىق قاۋىپسىزدىك جونىندەگى سامميت اياقتالدى.

 سونىڭ اياسىندا پرەزيدەنت 15 كە جۋىق شەت مەملەكەتتەردىڭ جانە ۇكىمەتتەرىنىڭ باسشىلارىمەن كەزدەسۋ وتكىزدى. جالپىعا بىردەي يادرولىق سىناققا تىيىم سالۋ تاقىرىبىندا ءبىرقاتار بىرلەسكەن مالىمدەمەلەردى تالقىلاپ، بەكىتۋگە قاتىستى.

بۇدان باسقا، مەملەكەت باسشىسى ا ق ش قوعام جانە ساياسي قايراتكەرلەرىمەن كەزدەسىپ ۇلگەردى»، دەلىنگەن جازبادا.

بۇل شارا ونداعان ساعات بويى پىكىرتالاس، پىكىر الماسۋ، ولاردى شەشۋ جولدارى، ۇستانىمدى قۋاتتاۋ جانە ءتىپتى ىزگى شاقىرتۋلاردى قامتىدى.

«سونىمەن قاتار كەي قىزىقتى وقيعالار كادر سىرتىندا قالدى. سامميت اياسىندا نۇرسۇلتان نازاربايەۆ ا ق ش پرەزيدەنتى باراك وباماعا سىيلىق تابىس ەتتى. ەستەرىڭىزدە بولسا، 2012 - جىلى سەۋلدە يادرولىق قارۋعا قارسى سامميتتە ب. وباما پرەزيدەنتتىك سايلاۋ قارساڭىندا مەملەكەت باسشىسىنان قازاق تۇمارىن سىيعا العان.

 وسى جولى قازاقستان پرەزيدەنتى بەلگىلى قازاقستاندىق سۋرەتشى، حالىقارالىق يادرولىق قارۋعا قارسى قوزعالىس بەلسەندىسى، اتوم جوباسىنىڭ (The Atom Project (ENG) ) قۇرمەتتى ەلشىسى كارىپبەك كۇيىكوۆتىڭ «جارىلىس» دەپ اتالاتىن كارتيناسىن سىيعا تارتتى.

نۇرسۇلتان ءابىش ۇلى وسى سىيلىعىمەن ەرەكشە جول كورسەتە وتىرىپ، وزەكتى ماسەلەگە تاعى دا نازار اۋدارتتى دەپ ويلايمىن»، دەپ جازادى داۋرەن ابايەۆ.