رەسەيدىڭ ساراتوۆ وبلىسىندا ناۋرىز مەيرامى كەڭىنەن تويلاندى - فوتو
وعان وسى ءوڭىردىڭ بارلىق اۋداندارى مەن قالالارىنان، سونداي باتىس قازاقستان وبلىسىنان ارنايى دەلەگاتسيالار قاتىستى.
ناۋرىز مەيرامىنا ساراتوۆ وبلىسىنداعى قازاق ۇلتىنىڭ وكىلدەرى بارىنشا كوبىرەك كەلىپ، ءبىر- بىرىمەن قۇشاقتاسا كورىسىپ، ۇلتتىق سالت- ءداستۇر مەن ونەرىمىزدى قادىرلەپ، قاستەرلەيتىنىن كورسەتتى. جالپى، باتىس قازاقستاننىڭ قازتالوۆ اۋدانىمەن شەكتەسەتىن الەكساندروۆ گايدا 18 مىڭ حالىق تۇرسا، سونىڭ 52 پايىزى - قازاقتار.
دەلەگاتسيالار مەن قۇرمەتتى قوناقتاردى ساراتوۆ وبلىسىنىڭ گۋبەرناتورى ۆالەري رادايەۆ پەن اۋدان باسشىسى سەرگەي فەدەچكين قابىلداپ، قۇرمەت كورسەتتى. سودان كەيىن ورتالىق الاڭداعى ۇلى وتان سوعىسىندا قازا تاپقان جاۋىنگەرلەردىڭ قۇرمەتىنە ماڭگىلىك الاۋعا گۇل شوقتارى قويىلىپ، ءبىر مينۋت ۇنسىزدىكپەن ەسكە الىندى.
قاراوزەن جاعاسىندا ورىن تەپكەن ورتالىق ساياباق ىشىنە جاعالاي تىگىلگەن جيىرماعا جۋىق كيىز ۇيدە ناۋرىز كوجە مەن باسقا دا ۇلتتىق تاعامدار ۇسىنىلدى. جارمەڭكە، كورمەلەر دە ۇيىمداستىرىلدى. قازتالوۆ اۋدانىنىڭ اكىمى نۇرلان بەكقايىر باستاعان اۋدان دەلەگاتسياسى دا كيىز ءۇي تىگىپ، ناۋرىز مەيرامىنا ءوز ۇلەستەرىن قوستى.
ورتالىق الاڭدا كونتسەرتتىك باعدارلاما قويىلىپ، وندا نەگىزىنەن قازاقتىڭ اندەرى ورىندالىپ، بيلەرى بيلەندى. جۇرتشىلىقتى ساراتوۆ وبلىسىنىڭ باسشىسى ۆ. رادايەۆ پەن بقو اكىمىنىڭ ورىنباسارى الماز باداشيەۆ قۇتتىقتاپ، ىزگى تىلەكتەرىن جەتكىزدى. كونسەرت بارىسىندا ساراتوۆ وبلىسىنىڭ شىعارماشىلىق ۇجىمدارىمەن بىرگە باتىس قازاقستاننان بارعان ع. قۇرمانعاليەۆ اتىنداعى وبلىستىق فيلارمونيا انشىلەرى، ورالداعى «يايك» فولكلورلىق- ەتنوگرافيالىق انسامبلى، قازتالوۆ اۋدانىنىڭ ونەرپازدارى، جالپاقتال اۋىلىنداعى «قىز جىبەك» تەرمەشىلەر ءانسامبلى ساحناعا كوتەرىلىپ، ءوز ونەرلەرىن كورسەتتى.
اۆتور: ەلجان ەرالى
