تالعات ەرمەگيايەۆتىڭ وققاعارى باستىعىنا سومكەلەپ قالاي اقشا تاسىعانىن ايتتى
سايات نادىربايەۆتى ەرمەگيايەۆتار وزدەرى ۇرلاپ، الماتىداعى تانىستارىنىڭ پاتەرىندە ۇستاپ وتىرىپتى، دەپ حابارلادى «ك ت ك» ارناسى.
تەرگەۋ ماتەريالىنا سۇيەنسەك، ەكسپو-نىڭ ەكس-ءتوراعاسى قازىنانىڭ قىرۋار قارجىسىن ۇيرەنشىكتى سىزبا بويىنشا جىمقىرىپ كەلگەن. باستاپقىدا حالىقارالىق كورمەنىڭ قۇرىلىسىنا بيۋدجەتتەن 15 ميلليارد تەڭگە بولىنگەن ەكەن.
تالعات ەرمەگيايەۆ بۇل سومانى جالعان تەندەرلەر وتكىزىپ، سىبايلاس كومپانيالارىنىڭ شوتىنا اۋدارىپتى. ءسويتىپ، 10 ميلليارد تەڭگەنى تالان-تاراجعا سالعان. ءوزى كوزگە تۇسپەس ءۇشىن اقشانى شوتتان شەشىپ الۋعا سەنىمدى ادامى، ءارى وققاعارى سايات نادىربايەۆتى جۇمساعان.
كۋاگەر رەتىندە جاۋاپ بەرۋ ساتىندە وققاعار، اقشانى قايدا جەتكىزگەنىن جاتقا سوعىپ وتىر. تەندەردە بيۋدجەتتىڭ ميللياردتارىن ۇتقان كاسىپكەرلەردىڭ ءبىرى ەرمەگيايەۆتى رەنجىتپەگەن ەكەن. سول سومكە تولى اقشانى نادىربايەۆ باسشىسىنىڭ الماتىداعى كوتتەدجىنە جەتكىزىپ وتىرعان.
«ءبىر كۇنى تالعات مەيرامحانادان شىقتى دا: ساعان ءبىر كىسى حابارالاسادى دەدى. كوپ ۇزاماي ماعان مارس دەگەن بەيتانىس جىگىت قوڭىراۋ شالدى. كەلىسىپ، كەزدەستىك. ول: كولىگىنىڭ ارتقى ورىندىعىندا جاتقان پاكەتتى ال. ىشىندە 200 ميلليون تەڭگە بار دەدى. وسىلاي، ماكسپەن بىرنەشە رەت جولىعىپ، بۋما-بۋما اقشا الدىم. تۇگەل تالعاتقا اكەلىپ بەردىم»، - دەدى ەرمەگيايەۆتىڭ وققاعارى سايات.
باستىعىنىڭ بىلىعىن اشكەرەلەپ بەرگەن سوڭ تەرگەۋشىلەر سايات نادىربايەۆتى بوستاندىققا قويا بەرەدى. الايدا، ول كەيىن جەر جۇتقانداي ۇشتى-كۇيلى جوعالعان.
ارتىنشا ونىڭ ايەلى: «قۇزىرلى ورگان قىزمەتكەرلەرى كۇيەۋىمدى قاساقانا ۇرلاپ كەتتى» دەپ اقپارات قۇرالدارى ارقىلى شۋ شىعارعان بولاتىن. ال جەمقورلىققا قارسى ۇلتتىق بيۋرو مۇنىڭ ءبارىن ادەيى ۇيىمداستىرىپ جۇرگەن تالعات ەرمەگيايەۆتىڭ اكەسى، ەلگە تانىمال كاسىپكەر، از-كەم بيلىكتە بولعان امانگەلدى ەرمەگيايەۆ دەپ وتىر. ياعني ، ۇلكەن ەرمەگيايەۆتىڭ جيەنى - سول باستى كۋاگەردى الماتىداعى تانىسىنىڭ ۇيىندە جاسىرىپ كەلىپتى.
جەتى ايدان بەرى باس ساۋعالاپ جۇرگەن نادىربايەۆتى ۇلتتىق بيۋرو قىزمەتكەرلەرى اقىرى قولعا ءتۇسىردى. ەرمەگيايەۆ وققاعارىن قىزعىشتاي قورعاپ، تەرگەۋشىلەردەن جاسىرىپ ۇستاۋىنىڭ سەبەبى بار. ويتكەنى، سايات نادىربايەۆ سوڭعى 6 جىل بويى ەكسپوعا جەتەكشىلىك ەتكەن ەكس-ءتوراعانىڭ ۇنەمى قاسىندا جۇرگەن جانە بۇكىل قىلمىسىنىڭ كۋاگەرى. كەزىندە، ارنايى جاساقتا قىزمەت ەتىپتى. ال اقپارات قۇرالدارىن شۋلاتىپ جۇرگەن وققاعاردىڭ كەلىنشەگى ناقتى ايعاقتارعا قاراماستان كۇيەۋىنىڭ جازىقسىز ەكەنىنە سەنىمدى.
«ەرمەگيايەۆتى ۇستاعان كەزدە مەنىڭ كۇيەۋىم ۇيدە بولعان. جۇمىس ىزدەپ ءجۇردى. جاسىرىنىپ قالۋ دەگەن ونىڭ ويىندا دا بولمادى. ونى پوليتسەيلەر 7 ايدان بەرى تابا الماي، ەندى سوتقا ءبىر اپتا قالعاندا اياق استى قولعا ءتۇسىردى»، - دەدى سايات نادىربايەۆتىڭ ايەلى.
تەرگەۋ مالىمەتتەرىنە قاراعاندا، «استانا- ەكسپو-2017» ۇلتتىق كومپانياسىنىڭ باسشىلىعى وسىنداي ءتۇرلى قۇيتىرقى جولمەن مەملەكەتتىڭ ميللياردتارىن قالتالارىنا باسىپتى. تالعات ەرمەگيايەۆ 4 ميللياردتى تەك پارا رەتىندە العان دەپ ايىپتالۋدا. قازىر ول استاناداعى پەنتحاۋسىندا ءۇي قاماقتا وتىر.
ال باسشىسىنا سومكەلەپ اقشا تاسىعان سايات نادىربايەۆ قازىر الماتىدا قاماۋدا. وققاعارعا ءىرى كولەمدە قارجى جىمقىردى دەگەن ايىپ تاعىلعان. ەندى ول باسقا سىبايلاستارمەن بىرگە سوت الدىندا جاۋاپ بەرەدى. ەگەر سايات نادىربايەۆ تەرگەۋ كەزىندەگى ايتقاندارىنان اينىپ قالماسا، تالعات ەرمەگيايەۆتىڭ ءالى تالاي بىلىعى اشىلۋى مۇمكىن.
