ن. نازاربايەۆ «نۇر وتان» پارتياسى ساياسي كەڭەسىنىڭ بيۋرو وتىرىسىنا قاتىستى

استانا. قازاقپارات - بۇگىن ەلباسى نۇرسۇلتان نازاربايەۆ «نۇر وتان» پارتياسى ساياسي كەڭەسىنىڭ بيۋرو وتىرىسىنا قاتىستى،

 دەپ حابارلادى اقوردانىڭ باسپا ءسوز قىزمەتىنەن.

وتىرىستا پارتيانىڭ پارلامەنتتىك سايلاۋعا قاتىسۋ قورىتىندىسى قارالىپ، پارتيالىق تىزىمگە ەنگىزىلگەن كانديداتتاردان پارلامەنت ءماجىلىسىنىڭ دەپۋتاتتىق مانداتىن ءبولۋ كەزەگى ايقىندالدى.

مەملەكەت باسشىسى وتكەن سايلاۋ بارىسىندا «نۇر وتان» پارتياسىنا تەڭدەسسىز قولداۋ كورسەتكەنىن اتاپ ءوتىپ، وسى رەتتە وتە جوعارى سەنىمدى اقتاۋ قاجەتتىگىن باسا ايتتى.

قازاقستان پرەزيدەنتى وتكەن سايلاۋ پروتسەسىن شامامەن 1 مىڭ بايقاۋشى مەن الەمنىڭ 51 ەلىنىڭ 150 بۇقارالىق اقپارات قۇرالىنىڭ وكىلى قاداعالاعانىن اتاپ ءوتتى. سايلاۋ اشىق، ءادىل جانە جوعارى ۇيىمشىلدىقپەن وتكىزىلدى دەپ تانىلدى. تولىقتاي العاندا، قازاقستاندىقتار بىرلىك پەن ۇيىمشىلدىقتى، سونىمەن بىرگە ەل دامۋىنا ءوز ۇلەسىن قوسۋعا ۇمتىلىستى پاش ەتتى. مەملەكەت باسشىسى جاڭا شاقىرىلىم دەپۋتاتتارى كورسەتىلگەن سەنىمدى اقتاۋى تيىستىگىن، ويتكەنى ولارعا ۇلت جوسپارىن ءتيىمدى جۇزەگە اسىرۋدىڭ ايرىقشا جاۋاپكەرشىلىگى جۇكتەلگەندىگىن باسا ايتتى.

نۇرسۇلتان نازاربايەۆ كانديداتتاردىڭ بەكىتىلگەن ءتىزىمى بارلىق تالاپتار مەن كريتەريلەرگە جاۋاپ بەرەتىندىگىنە، وڭىرلىك، الەۋمەتتىك، كاسىبي تۇرعىدا تەڭگەرىمدى ەكەندىگىنە نازار اۋداردى. قازاقستان پرەزيدەنتى دەپۋتاتتاردىڭ پارلامەنتتە ەلدىڭ جەتەكشى ساياسي كۇشى - «نۇر وتان» پارتياسى اتىنان وكىلدىك ەتەتىندىگىن اتاپ ءوتتى.

بۇعان قوسا، مەملەكەت باسشىسى پارتيا الدىنا ءبىرقاتار تاپسىرما جۇكتەدى.

 اتاپ ايتقاندا، ۇكىمەتپەن بىرلەسىپ، ۇلت جوسپارى مەن 5 ينستيتۋتتىق رەفورمانى جۇزەگە اسىرۋ پروتسەسىن زاڭنامالىق قامتاماسىز ەتۋى قاجەت. سونداي- اق قازاقستاندىقتار داۋىس بەرگەن سايلاۋالدى باعدارلامانى دەر ۋاقىتىندا جۇزەگە اسىرۋعا جاردەمدەسۋى كەرەك.

مۇنان، بولەك، قازاقستان پرەزيدەنتى «نۇرلى جول» باعدارلاماسىنىڭ جۇزەگە اسىرىلۋ بارىسى مەن بيۋدجەت قارجىسىن ءتيىمدى جۇمسالۋىنا پارتيالىق باقىلاۋ جۇمىستارىن كۇشەيتۋدى تاپسىردى.

مەملەكەت باسشىسى حالىقتىڭ وزەكتى پروبلەمالارىن انىقتاۋ جانە ولاردى شەشۋگە جان- جاقتى جاردەمدەسۋ، سونداي- اق قازاقستان حالقى اسسامبلەياسىمەن تىعىز ءوزارا ءىس- قيمىلدى جولعا قويۋ قاجەتتىگىن اتاپ ءوتتى.

وتىرىس بارىسىندا ساياسي كەڭەس بيۋروسىنىڭ مۇشەلەرى - ق ر پارلامەنتى سەناتىنىڭ ءتوراعاسى ق. توقايەۆ پەن قازاقستان حالقى اسسامبلەياسىنىڭ مۇشەسى ا. باشماكوۆ ءسوز سويلەدى.

 ساياسي كەڭەس بيۋروسى جۇمىسىنىڭ قورىتىندىسىندا قازاقستان رەسپۋبليكاسى پارلامەنتى ءماجىلىسى دەپۋتاتتىق مانداتىن ءبولۋ كەزەگىن انىقتاۋ تۋرالى قاۋلى قابىلداندى.

اۆتور: مارلان جيەمباي