قازاقستاندىق وندىرۋشىلەر اسكەردى سولدات باتەڭكەسىمەن قامتاماسىز ەتۋگە دايىن
بۇل تۋرالى «اتامەكەن» ۇلتتىق كاسىپكەرلەر پالاتاسى وڭدەۋ ونەركاسىبى كوميتەتىندە قورعانىس سالاسىنىڭ فورمالىق كيىم ۇلگىسىنىڭ تەحنيكالىق ەرەكشەلىكتەرى مەن مەملەكەتتىك قورعانىس تاپسىرىسىن تالقىلاۋعا ارنالعان جيىن بارىسىندا ءمالىم بولدى.
جيىن بارىسىندا كەلتىرىلگەن مالىمەتتەرگە قاراعاندا، قازىرگى تاڭدا قازاقستاندا اسكەري كيىم تىگەتىن 100 گە تارتا وتاندىق وندىرۋشىلەر بار. سونىمەن قاتار، جەڭىل ونەركاسىپ كاسىپورىندار قاۋىمداستىعى 2016-جىلعا قورعانىس سالاسىنداعى فورمالىق كيىم ۇلگىسىنىڭ مەملەكەتتىك ستاندارتتارىن ماقۇلداۋ كەستەسىن ازىرلەگەن. قاۋىمداستىق پرەزيدەنتى ليۋبوۆ حۋدوۆانىڭ ايتۋىنشا، 2016-جىلدىڭ 1-ساۋىرىنە دەيىن بارلىق كاسىپورىندار اسكەري كيىمدەردەگى ۇلتتىق ستاندارتتارعا قاتىستى وزدەرىنىڭ ۇسىنىستارى مەن ەسكەرتۋلەرىن جولدايتىن بولادى.
«تالقىلاۋ بارىسىندا قازاقستاندىق جەڭىل ونەركاسىپ كاسىپورىندارى سۋ جۇقپايتىن تەرىدەن جاسالاتىن ىلگەكتى سولدات باتەڭكەسىن شىعارۋ تۋرالى باستاما جاسادى. ولار باتەڭكەنى قورعانىس مينيسترلىگىنە بەرىكتىگىن تەكسەرۋ ءۇشىن بەرۋگە دە ءازىر ەكەندىكتەرىن العا تارتتى»، - دەلىنگەن باسپا ءسوز بايانىندا.
بۇدان بولەك، وتىرىس بارىسىندا 2016-جىلعا قورعانىس تاپسىرىسىن قالىپتاستىرۋ ماسەلەلەرى دە تالقىلاندى. بۇل رەتتە جەڭىل ونەركاسىپ كاسىپورىندارىنا تەڭگە باعامىنداعى تۇزەتۋلەردى ەسكەرە وتىرىپ، باعا باسەكەلەستىگىن ورنىقتىرۋ تۋرالى پروبلەمالار دا ايتىلدى. ماسەلەن، «قازاقستان ينجينيرينگ» ۇ ك» ا ق دەپارتامەنت ديرەكتورى مالىك سىزدىقوۆتىڭ سوزىنە قاراعاندا، قازىرگى تاڭدا 96 كومپانيا ىقتيمال جەتكىزۋشىلەر رەتىندە تىزىمگە ەنگىزىلگەن. «الايدا، ول كاسىپورىنداردىڭ بارلىعى بىردەي قاجەتتى ماتەريالداردى ۇسىنباي وتىر. سونىمەن قاتار، قورعانىس تاپسىرىستارىن ورىنداۋ ءۇشىن وڭىرلەر بويىنشا كاسىپورىنداردى بەكىتۋ ءتيىمدى دەپ سانايمىز»، - دەدى م. سىزدىقوۆ.
اۆتور: قانات مامەتقازى ۇلى
