مۇناي سالاسىندا ىستەيتىن شەتەلدىك كومپانيالار قازاقستاندىق كاسىپورىندار ءونىمىن ساتىپ الۋعا قۇلىقسىز

 استانا. قازاقپارات - مۇناي سالاسىندا ىستەيتىن شەتەلدىك كومپانيالار قازاقستاندىق كاسىپورىندار ءونىمىن ساتىپ الۋعا قۇلىقسىز. بۇل تۋرالى بۇگىن اقتوبە مۇناي قۇرال- جابدىقتارى زاۋىتىنىڭ باس ديرەكتورى عاسال مۋسين ايتتى.

«ءبىزدىڭ بارلىعىمىز دا ءبىر- بىرىمىزگە قولداۋ كورسەتپەسەك قۇردىمعا كەتەتىندىگىمىزدى جاقسى بىلەمىز. وسىدان ءبىر جىل بۇرىن ءارى سەرتيفيكاتىنان وتكەن ەدىك، ال بيىل ۇيىمداستىرىلعان اۋديت ونى قۋاتتادى»، - دەدى ول «اتامەكەن» ۇلتتىق كاسىپكەرلەر پالاتاسى مەن جەكە كاسىپكەرلىك سۋبەكتىلەرى، قاۋىمداستىقتار اراسىنداعى كەلىسىمىنە قول قويۋ بارىسىندا.

ونىڭ ايتۋىنشا، «قازمۇنايگاز» ءو ب كومپانياسى اقتوبە مۇناي قۇرال- جابدىقتارىن ساتىپ الىپ وتىر. ال شەتەلدىك مۇناي كومپانيالار بولسا قازاقستاندىق ءونىمدى ساتىپ الۋعا قۇلىقسىز.

 «ماسەلەن، بىزدەر «تەڭىزشيەۆرويل» نەمەسە CNPС كومپانياسىنىڭ بىردە- ءبىر تەندەرىن ۇتىپ العان ەمەسپىز. ۇتىپ الماق تۇرماق بىزدەر وعان قاتىسا دا المايمىز. ياعني، ولار جاسىرىن وتكىزەدى. ءونىمدى جەتكىزۋ مەرزىمىن 10 كۇن دەپ بەلگىلەپ قوياتىن كەزدەرى دە وتە ءجيى. بىردە- ءبىر ءوندىرۋشى ون كۇننىڭ ىشىندە ونى اتقارا المايدى. سوندىقتان دا، بۇل رەتتە ۇلتتىق كاسىپكەرلەر پالاتاسى باقىلاۋ جۇرگىزگەنى ءجون سياقتى. ماسەلەن، ولار تولەم جاساۋ مەرزىمىن 120 كۇن، ال ءونىمدى جەتكىزۋ ۋاقىتىن 10 كۇن دەپ بەلگىلەيدى. ال CNPС بولسا ءوزىنىڭ قىتايلىق كومپانيالارىنا جەتكىزىلگەن ءونىمدى كەلەسى كۇنى- اق اۋدارا الادى. وتاندىق وندىرۋشىلەر ءۇشىن ولار تەك 120 كۇننەن كەيىن تولەم جۇرگىزەدى»، - دەدى ع. مۋسين.