قازىرگى ۋاقىتتا ديپلوماتيالىق قىزمەت جۇمىسىن جاقسارتۋدىڭ ماڭىزى زور - ن. نازاربايەۆ

استانا. قازاقپارات - بۇگىن ەلوردادا ق ر پرەزيدەنتى نۇرسۇلتان نازاربايەۆتىڭ توراعالىعىمەن ەلىمىزدىڭ سىرتقى ىستەر مينيسترلىگىنىڭ كەڭەيتىلگەن القا ءماجىلىسى ءوتىپ جاتىر.

«بيىل قازاقساننىڭ تاۋەلسىزدىگىنە شيرەك عاسىر تولايىن دەپ وتىر. وسى جىلداردىڭ ىشىندە سىزدەر مەن بىزدەر ەڭ العاشقى بۋىن رەتىندە قازاقستاننىڭ تاۋەلسىزدىگىن ورناتۋعا اتسالىستىق. قازاقستان دەگەن مەملەكەت دۇنيەجۇزىنىڭ كارتاسىندا جوق ەدى، ونى ءبىز دۇنيەجۇزىنىڭ كارتاسىنا ەنگىزدىك. جاڭادان ەش ۋاقىتتا بولماعان ينستيتۋتتاردى قۇردىق، مەملەكەتتى قۇردىق. ونىڭ مينيسترلىكتەرىن قۇرىپ، ىشكى-سىرتقى ساياساتتى جولعا قويدىق، شەكارانى شەگەندەدىك. سىرتقى ساياساتتىڭ جاڭا ءۇردىسىن قازاقستانعا اكەلدىك»، - دەدى القالى جيىندى اشقان ەلباسى.

ق ر پرەزيدەنتى تاۋەلسىزدىك العانعا دەيىن ەلىمىزدىڭ سىرتقى ساياساتى، ديپلوماتتارى بولماعانىن، بۇرىنعى كەڭەس وداعىندا قىزمەت اتقارىپ جۇرگەن قازاقستاندىق ديپلوماتتاردى بىرتىنەپ جيناپ، سولاردى العاشقى ديپلوماتتار قىلىپ دايىنداعانىمىزدى اتاپ ءوتتى.

«ال قازىر ءبىز 200 گە تارتا مەملەكەتپەن قارىم-قاتىناس جاسايمىز. ءبىزدىڭ ەلدە دە 60 قا جۋىق ەلشىلىكتەر مەن دۇنيەجۇزىلىك ۇيىمداردىڭ ۋاكىلدەرى جۇمىس ىستەپ جاتىر. قازاقستاننىڭ دارەجەسى دۇنيەجۇزىنە بەلگىلى بولدى. كوپتەگەن حالىقارالىق ۇيىمداردىڭ جۇمىستارىن قازاقستاندا وتكىزىپ، ەلدى بۇكىل دۇنيەگە پاش ەتتىك. قازاقستان ءوزىنىڭ دۇنيەجۇزىلىك جۇمىستارعا كىرىسۋىمەن، ۇلكەن سامميتتەردى وتكىزۋىمەن حالىقارالىق ۇيىمنىڭ بارلىعىنان ءوز دارەجەسىن، ءوز ورنىن الدى. مۇنىڭ بارلىعى دا - ءبىزدىڭ جەتىستىكتەرىمىز»، - دەدى ق ر پرەزيدەنتى.

وسى رەتتە مەملەكەت باسشىسى بۇگىنگى القا ماجىلىسىندە الدىمىزدا تۇرعان قيىن-قىستاۋ كەزەڭدەگى ناقتى اتقارىلاتىن جۇمىستار تالقىعا تۇسەتىندىگىن ايتتى.

«الدىمىزدا تۇرعان، اسىرەسە، ديپلوماتتاردىڭ الدىندا تۇرعان ماسەلەلەردى قارايتىن بولامىز. قازىرگى زاماننىڭ بەتالىسى بىزگە باسقا تالاپتاردى قويىپ وتىر. سوندىقتان، ديپلوماتيالىق قىزمەت جۇمىسىن جۇرگىزە ءتۇسۋدىڭ، وسىرە ءتۇسۋدىڭ، جاقسارتا ءتۇسۋدىڭ ماڭىزى ءبارىمىز ءۇشىن وتە زور»، - دەدى ن. نازاربايەۆ.

اۆتور: مارلان جيەمباي