سەنات: «بايقوڭىر» عارىش ايلاعىنا قاتىستى كەلىسىمگە وزگەرىستەر ەنگىزىلەدى

استانا. قازاقپارات - بۇگىن پارلامەنت سەناتى اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ كەڭەيتىلگەن وتىرىسى ءوتتى.

وندا «1999-جىلعى 18- قاراشادا جاسالعان قازاقستان رەسپۋبليكاسىنىڭ ۇكىمەتى مەن رەسەي فەدەراتسياسى ۇكىمەتىنىڭ اراسىنداعى «بايقوڭىر» عارىش ايلاعىنان زىمىرانداردى جىبەرۋ كەزىندە اۆاريالار بولعان جاعدايداعى ءوزارا ءىس-قيمىل ءتارتىبى تۋرالى كەلىسىمگە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسى تالقىلاندى. قۇجات الداعى ۋاقىتتا وتەتىن پالاتانىڭ جالپى وتىرىسىنا شىعارىلادى.

«قازاقستان مەن رەسەي اراسىنداعى كەلىسىمگە وزگەرىستەر ەنگىزىلگەن حاتتاماعا 2015-جىلدىڭ 2- ماۋسىمىندا قول قويىلعان. حاتتامادا نەگىزىنەن «بايقوڭىر» عارىش ايلاعىنان زىمىراندى ۇشىرۋ بارىسىندا اپاتتار ورىن العان جاعدايدا قۇرىلاتىن كوميسسيالار، بىرلەسكەن شتابتار مەن ۋاكىلەتتى ورگانداردىڭ قۇزىرەتتەرى ناقتىلانادى»، - دەدى ىشكى ىستەر ۆيتسە-ءمينيسترى ۆلاديمير بوجكو.

توقتالا كەتەتىن جايت، كەلىسىمگە وزگەرىستەر ەنگىزۋگە قازاقستان تاراپى باستاماشىلىق جاساعان. ويتكەنى، بۇعان دەيىن «بايقوڭىردا» ورىن العان اپاتقا بايلانىستى ونىڭ سالدارىن جويۋ پروتسەسىندە ءبىرقاتار ماسەلەلەر تۋىنداعان بولاتىن. مۇنداي سالداردى رەتتەۋ قولدانىستاعى كەلىسىمدەردە كورسەتىلمەگەن. وسىعان بايلانىستى 2015-جىلى ەكى تاراپ ورتاق مامىلەگە كەلىپ، حاتتاماعا قول قويىلدى.

ۆيتسە-مينيستر ۆلاديمير بوجكونىڭ ايتۋىنشا، كەلىسىمگە سايكەس، رەسەي تاراپى قازاقستانعا جوسپارداعى ۇشىرۋلار تۋرالى ءبىر اي بۇرىن جانە 15 كۇن قالعاندا رەسمي حابارلاۋى ءتيىس. ۇشىرۋ تۋرالى سوڭعى اقپارات زىمىران ۇشىرىلاتىن ۋاقىتتان 8 ساعات بۇرىن تاعى بەرىلۋى شارت.

وسىعان وراي، ۇشىرۋعا ءبىر تاۋلىك ۋاقىت قالعاندا زىمىران قالدىقتارى قۇلايتىن اۋماقتارداعى توتەنشە جاعدايلار جونىندەگى بولىمشەلەر اسكەري دايىندىققا كەلتىرىلەدى. بۇدان بولەك، وزگەرىستەرگە سايكەس، ەگەر اپات ورىن السا، وندا 12 ساعات ىشىندە كوميسسيا قۇرىلىپ، ال ءبىر تاۋلىك وتكەندە اپات سالدارىن جويۋ جونىندەگى شتاب جۇمىسقا كىرىسەتىن بولادى. حاتتامادا اپات سالدارىن جويۋعا قانداي كۇشتەر جۇمىلدىرىلاتىنى ناقتىلانعان.

زاڭ جوباسى پالاتانىڭ جالپى وتىرىسىنا شىعارىلادى.

اۆتور: قانات مامەتقازى ۇلى