داۋرەن ابايەۆ «نۇر وتان» پارتياسىنىڭ اتىنان ۇمىتكەرلەر تىزىمىنە سپورتشىلار مەن ارتىستەردىڭ ەنۋىنە بايلانىستى تۇسىنىكتەمە بەردى
«الەۋمەتتىك جەلىلەردىڭ پايدالانۋشىلارى «نۇر وتاننىڭ» پارتيالىق تىزىمىندە سپورتشىلار مەن ارتىستەردىڭ بولۋىنا ءبىرتۇرلى قارادى. پارلامەنتتە حالىق سۇيىكتىلەرى ەمەس، دايىندالعان جانە تاجىريبەلى ماماندار كەرەك ەكەنى تۋرالى پىكىر ايتىلدى. وسى ماسەلەگە قانداي تۇسىنىكتەمە بەرەسىز؟» دەگەن سۇراققا ول:
«مەن جەلىدە ايتىلعان سوزدەردىڭ كوبى ءازىل دەپ ويلايمىن. ەگەر بىرەۋ بۇل ماسەلەنى شىنداپ كوتەرسە، وندا بۇكىل ءتىزىمدى مۇقيات قاراماعان بولار. «نۇر وتان» پارتياسىنان دەپۋتاتتىققا ۇمىتكەرلەردىڭ سانى - 127 ادام، سونىڭ ىشىندە سپورت پەن شوۋ-بيزنەس جۇلدىزدارى - نەبارى 6-7 ادام. ولار تىزىمدە قازاقستاندىقتار ءۇشىن ەڭ كوپ تانىمالدىلىعىنان ەرەكشەلەنگەن شىعار.
تىزىمگە جالپى العاندا كەلەتىن بولساق، مەنىڭ ويىمشا، ول ماكسيمالدى تۇردە ۇيلەستىرىلىپ، جاڭا ەكونوميكالىق جاعدايداعى ءتيىمدى جۇمىسقا باعىتتالعان. وندا ورىندارداعى جۇمىستىڭ قىر-سىرىن بىلەتىن، الەۋمەتتىك سالا، ەنەرگەتيكا، بيزنەس جانە وزگە دە سالالاردا جۇمىستىڭ باي تاجىريبەسى بار ايماقتارداعى پارتيالىقتار بار.
بۇدان باسقا، پارتيالىق تىزىمگە مەملەكەتتىك باسقارۋدىڭ ەڭ جاۋاپتى ۋچاسكەلەرىندە قىزمەت اتقاراتىن ادامدار كىردى»، - دەپ جاۋاپ بەردى د. ابايەۆ اقوردانىڭ فەيسبۋكتەگى رەسمي پاراقشاسىندا.
