وليمپيادا چەمپيونى ولگا رىپاكوۆا دەپۋتاتتىق مانداتقا تالاسپاق
ساياسي ناۋقانعا تۇسەتىن دەپۋتاتتار قۇرامى دا انىق بولدى. ماسەلەن، وبلىس ءماسليحاتىنا 43 ماندات، قالالىققا - 73، ال اۋداندىق ءماسليحاتقا 205 دەپۋتات سايلانۋى ءتيىس. حالىق قالاۋلىسى بولعىسى كەلەتىن ۇمىتكەرلەر اراسىندا وليمپيادا چەمپيونى ولگا رىپاكوۆا دا بار.
وليمپيادا جۇلدەگەرى ولگا رىپاكوۆا ءۇشىن باستى جارىس - ريو-دە-جانەيرودا وتەتىن جارىس. سپورت ساڭلاعى بايراقتى باسەكەگە بارىن سالىپ دايىندالىپ جاتىر. ال وبلىستىق ءماسليحاتقا ۇمىتكەر رەتىندە ۇسىنىلعانىن ەستىگەندە، ءسال قوبالجىعانىن جاسىرمايدى. «ارىپتەستەرىمنىڭ دە پىكىرى ءارتۇرلى بولدى»، - دەيدى وليمپيادا چەمپيونى.
«بىرەۋلەر «دەپۋتاتتىقتىڭ نە كەرەگى بار، سەن سپورت ادامى ەمەسسىڭ بە، ساياساتتان نە تۇسىنەسىڭ؟» دەدى. ال كەيبىرەۋلەرى، ماعان سەنىم ارتىپ، «كەلەشەگىڭ ءۇشىن جاقسى قادام جاساپ جاتىرسىڭ» دەگەندى ايتتى، - دەيدى ولگا رىپاكوۆا.
شىعىس قازاقستاندا وليمپيادا چەمپيونى قوعامنىڭ بەلسەندى مۇشەسى رەتىندە تانىمال. ول ەڭبەك ۇجىمدارى مەن جاس بۋىن وكىلدەرىمەن ءجيى كەزدەسۋلەر وتكىزىپ تۇرادى. ءتىپتى، ولگا - ءوزىنىڭ تاباندىلىعى مەن توزىمدىلىگىنىڭ ارقاسىندا وسكەمەندەگى جەڭىل اتلەتيكا مانەجىنىڭ قۇرىلىسىن العاشقى ساتتەن باقىلاۋعا العانداردىڭ ءبىرى. «ءدال وسىنداي، بەلسەندى، ويلى جاستار وبلىستىق ءماسليحاتتىڭ قۇرامىندا بولۋ قاجەت»، - دەيدى بىرنەشە شاقىرىلىمنىڭ دەپۋتاتى مايراش ەكىباسوۆا.
