شىعىس قازاقستانداعى ەتنومادەني ۇيىمدار سايلاۋعا بەلسەندى اتسالىسۋعا شاقىردى

جيىننىڭ نەگىزگى تاقىرىبى - ق ر پرەزيدەنتىنىڭ V شاقىرىلىمداعى پارلامەنت ءماجىلىسى دەپۋتاتتارىنىڭ ۋاكىلەتتىلىگىن مەرزىمىنەن بۇرىن توقتاتىپ، 2016-جىلدىڭ 20- ناۋرىزىندا سايلاۋ وتكىزۋ تۋرالى جارلىعى بولدى. مەملەكەت باسشىسىنىڭ حالىققا ارناعان ۇندەۋىندەگى ءاربىر پۋنكت دوڭگەلەك ۇستەلگە قاتىسۋشىلاردىڭ تاراپىنان قىزۋ تالقىعا ءتۇستى.

شىعىس قازاقستان وبلىستىق قازاقستان حالقى اسسامبلەياسىنىڭ مۇشەلەرى، ەتنومادەني ۇيىمدارىنىڭ كوشباسشىلارى، دوستىق ءۇيىنىڭ قىزمەتكەرلەرى ءبىراۋىزدان پارلامەنتتىك سايلاۋ مەن بارلىق دەڭگەيدەگى ءماسليحات سايلاۋلارىن بىرگە وتكىزۋ وتە ءتيىمدى ەكەنىن اتاپ ءوتتى.

«پرەزيدەنتىڭ مەرزىمىنەن بۇرىن سايلاۋ وتكىزۋ تۋرالى جارلىعى - قازىرگى قيىن-قىستاۋ كەزەڭدە وتە ورىندى جانە دەر كەزىندە قولعا الىنعان قادام بولدى»، - دەيدى ورىس مادەني ورتالىعىنىڭ جەتەكشىسى نيكولاي زايتسيەۆ.

ن. زايتسيەۆتىڭ پىكىرىنشە، الەمدىك داعدارىسقا بايلانىستى الدىمىزدا قيىن كەزەڭدەردىڭ كۇتىپ تۇرعانىن اتاپ وتكەن ەلباسىنىڭ سوزىنە قۇلاق ءتۇرۋ كەرەك. سوندىقتان، قارجىنى دا، ۋاقىتتى دا، ءتىپتى جۇمىس ورىندارىن دا وتە ۇنەمدەۋ كەرەك. «ءبىزدىڭ ەلىمىز مۇنداي قيىندىقتى العاش رەت كورىپ وتىرعان جوق، دەگەنمەن بىرلىگىمىزدى ساقتاي وتىرىپ، دامۋعا بەت الا، قانداي داعدارىستى دا جەڭگەنبىز. بۇل جولى دا قازاقستان دىتتەگەن ماقساتىنا جەتەدى دەگەنگە كامىل سەنەمىن. سەبەبى، قازاقستاننىڭ حالقى بىرگە»، - دەدى ءسوزىن تۇيىندەگەن ن. زايتسيەۆ.

دوڭگەلەك ۇستەلدىڭ سوڭىندا ەتنومادەني بىرلەستىكتەردىڭ جەتەكشىلەرى شىعىس قازاقستاننىڭ حالقىن سايلاۋعا بەلسەندى قاتىسۋعا شاقىرىپ، ۇندەۋ قابىلدادى.

اۆتور: كەنجەكەي توقتامۇرات قىزى