ق. توقايەۆ: پرەزيدەنت ۇسىنعان جاڭا قازاقستاندىق ارمان - بۇكىل حالىقتىڭ ارمانى

بۇگىن پارلامەنت سەناتىنىڭ جالپى وتىرىسىندا سپيكەر قاسىم-جومارت توقايەۆ ق ر پرەزيدەنتى ن. نازاربايەۆتىڭ «ۇلت جوسپارى - قازاقستاندىق ارمانعا باستايتىن جول» اتتى باعدارلامالىق ماقالاسىنا قاتىستى پىكىرىن وسىلاي ءبىلدىردى.

«ەلباسى مەملەكەتتى نىعايتۋمەن قاتار، جاڭا قازاقستاندىق ارمانعا قول جەتكىزۋدىڭ ناقتى تەتىكتەرىن ايقىنداپ بەردى. وتانداستارىمىز ەلباسىنىڭ جاڭا ەڭبەگىنە قىزۋ قولداۋ بىلدىرۋدە، حالىقارالىق ساراپشىلار تاراپىنان دا جوعارى باعا بەرىلىپ جاتىر. پرەزيدەنت ۇسىنىپ وتىرعان جاڭا قازاقستاندىق ارمان بۇكىل حالىقتىڭ ارمانى بولىپ وتىر»، - دەدى ق. توقايەۆ.

سونىمەن قاتار، سپيكەر ەلباسى پارلامەنت پەن ۇكىمەتتىڭ تەڭدەسسىز جۇمىسىن جوعارى باعالاعانىن اتاپ ءوتتى. ونىڭ ايتۋىنشا، الدىدا تۇرعان مىندەتتەردى جۇزەگە اسىرۋ قازاقستاندى، ونىڭ ەكونوميكاسىن، جالپى مەملەكەت پەن قوعامدى تۇبەگەيلى وزگەرتەتىن تاريحي مىندەتتەردى شەشۋگە داڭعىل جول سالاتىنى ءسوزسىز.

«جاھاندىق الەمدە قالىپتاسىپ وتىرعان قۇبىلمالى جاعدايعا قاراماستان، جاڭعىرتۋدىڭ كەشەندى شارالارىن ىسكە اسىرۋ بارشامىزعا ايرىقشا جاۋاپكەرشىلىك جۇكتەيدى. وسى ورايدا سەنات دەپۋتاتتارى ەلباسى تاپسىرمالارىن ورىنداۋعا بەلسەنە قاتىسادى دەپ كامىل سەنەمىن»، - دەدى سپيكەر ق. توقايەۆ.

اۆتور: قانات مامەتقازى ۇلى