مەرزىمىنەن بۇرىن پارلامەنت سايلاۋىن وتكىزۋ تۋرالى ازىرگە ناقتى شەشىم قابىلدانبادى - داۋرەن ابايەۆ
استانا. قازاقپارات - كەزەكتەن تىس پارلامەنت سايلاۋىن وتكىزۋگە قاتىستى اقپاراتتىق اگەنتتىكتەردەن ءتۇسىپ جاتقان ساۋالعا ق ر پرەزيدەنتىنىڭ كەڭەسشىسى - قازاقستان رەسپۋبليكاسى پرەزيدەنتىنىڭ باسپا ءسوز حاتشىسى داۋرەن ابايەۆتىڭ جاۋابى:
- دەپۋتاتتاردىڭ ءماجىلىستى تاراتۋ مەن مەرزىمىنەن بۇرىن سايلاۋ وتكىزۋ تۋرالى باستاماسى جونىندە پرەزيدەنت، ارينە، حاباردار. بۇل ماسەلە بويىنشا ازىرگە شەشىم قابىلدانبادى. ويتكەنى، جان-جاقتى ساراپتاۋ قاجەت. نۇرسۇلتان ءابىش ۇلى، الدىمەن قوعامنىڭ جانە ەلدەگى جاعدايدى ەسكەرە وتىرىپ، تارازىلايدى دەپ ويلايمىن. سونداي-اق، كونستيتۋتسياعا سايكەس، ەلباسى پارلامەنتتىڭ قوس پالاتاسىنىڭ سپيكەرلەرىمەن جانە پرەمەر-مينيسترمەن كەڭەس وتكىزەدى. وسىدان كەيىن عانا ناقتى شەشىمدى بىلەتىن بولامىز.
