سەناتور ج. ەرعاليەۆ: ەل بىرلىگى ءۇشىن بارشامىز جاۋاپتىمىز

ونىڭ ايتۋىنشا، ءبىز ءوز تاۋەلسىزدىگىمىزدىڭ قاسيەتتى كەزەڭىندە تۇرمىز. قازاق ەلىنىڭ تاۋەلسىز بولعانىنا شيرەك عاسىر. وسى ۋاقىت ارالىعىندا قازاقستاندى الەم تانىدى.

«بۇگىنگى ءجۇرىسى دە، ەكپىنى دە قاتتى ۋاقىت ۇدەرىسىندەگى شيرەك عاسىر كوزدى اشىپ جۇمعانشا كەزەڭ بولار. الايدا، وسى ءبىر قاس قاعىمدىق ساتتە قازاقستاننىڭ الەمدىك ارەناداعى ابىرويى مەن بەدەلى اسقاقتاي ءتۇستى. ارينە، بۇل ءوزىمىزدىڭ ەلباسىمىز، تاۋەلسىز ەلىمىزدىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆتىڭ ارقاسى ەكەندىگى داۋ تۋدىرمايتىن ماسەلە»، - دەيدى سەناتور جابال ەرعاليەۆ.

ەلباسىنىڭ «ۇلت جوسپارى قازاقستاندىق ارمانعا باستايتىن جول» ماقالاسى بۇگىنگىدەي الەمدىك داعدارىس جاعدايىندا قازاقستاننىڭ سول ارمانعا باستايتىن جولدان اداستىرماس تەمىرقازىعى ىسپەتتەس. ەلىمىزدىڭ كۇردەلى زاماننىڭ كۇرمەۋىن شەشۋ جولىن ەلباسى تاعى دا ناقتىلى اتاپ كورسەتىپ بەردى.

«ءبىز ماڭگىلىك ەل بولۋدى مۇرات ەتىپ وتىرعان ەلمىز. ال، ءبىزدىڭ ماڭگىلىك ەل بولا الاتىندىعىمىزعا كۇمانىمىز جوق. ХХІ عاسىردىڭ ورتاسىنا قاراي قازاقستاندى الەمنىڭ اسا دامىعان 30 ەلىنىڭ قاتارىنا قوسۋدى جوسپارلاپ وتىرمىز. ەلباسى جاھاندىق داعدارىسقا دا قاراماستان قازاقستاندى 100 ناقتى قادام ۇلت جوسپارىن العا تارتتى. سوڭعى بىرەر جىل اياسىنداعى ەلىمىزدىڭ سەرپىندى دامۋىنىڭ ناقتىلى قادامدارى جاسالدى. ەڭ اۋەلى ەلباسىنىڭ باستاماسىمەن ەۋرازيالىق ەكونوميكالىق وداق قۇرىلدى، قازاستان قازىر دۇنيەجۇزىلىك ساۋدا ۇيىمىنىڭ مۇشەسى. وسىنىڭ ءبارى ەلىمىزدىڭ سەرپىندى دامۋىنا جول اشا تۇسكەندىگى ءسوزسىز.

ەلباسى العا تارتىپ وتىرعان ۇلت جوسپارىن ورىنداپ شىعۋ ءۇشىن پارلامەنت اسا قىسقا مەرزىمدە 59 دان استام زاڭ قابىلدادى. بۇل زاڭداردىڭ بارلىعى دا ەلباسىنىڭ العا قويىپ وتىرعان ىستەرىن جۇزەگە اسىرۋدى زاڭدىق تۇرعىدان قامتاماسىز ەتۋ مۇمكىندىگىنە جول اشتى. ۇلت جوسپارىنىڭ قازاقستاندى جاڭعىرتۋدىڭ باستى جوباسى ەكەندىگىن اتاپ كورسەتتى. قازاقستاندى جاڭعىرتۋ ءۇشىن ءبارىمىز دە جاۋاپتىمىز. ول جاۋاپكەرشىلىكتىڭ باستى مىندەتى ەل بىرلىگىن ساقتاۋ بولىپ تابىلادى. بۇگىنگىدەي الماعايىپ زاماندا قازاقستاندىقتاردىڭ ۇيىعان بىرلىگى مەن ىنتىماعىن ودان ءارى نىعايتۋ ءارقايسىمىزدىڭ باستى مىندەتىمىز بولىپ سانالادى. ەل بىرلىگى ءۇشىن بارشامىز جاۋاپتىمىز»، - دەپ ءسوزىن قورىتىندىلادى سەناتور.

اۆتور: اسلان وسپانوۆ