شەتەلدىك ب ا ق پرەزيدەنت ماقالاسىنا نازار اۋداردى

 قازاقستاندا جەمقورلىقپەن كۇرەس كەزەڭ- كەزەڭىمەن جۇيەلى تۇردە ىسكە اسىرىلماق. بۇگىن ءبىرقاتار رەسەيلىك جانە شەتەلدىك باسىلىمداردا وسىنداي تاقىرىپتا ماقالالار جارىق كوردى.

جۋرناليستەر ەلباسىنىڭ ءسوزىن دايەك رەتىندە كەلتىرە وتىرىپ، ساراپتاما جاساعان. «يتار- ت ا س س» اقپاراتتىق اگەنتتىگىنىڭ ءتىلشىسى ءوز ماقالاسىندا نۇرسۇلتان نازاربايەۆتىڭ جەمقورلىقپەن كۇرەسكە باعىتتالعان شارالار تۋرالى پىكىرىنە ەرەكشە توقتالعان. وقىرماندارعا قازاقستاندا مەملەكەتتىك قىزمەت تۋرالى جاڭا زاڭ جوباسى قابىلدانعانىن ايتا كەلە، مەملەكەتتىك قىزمەتشىلەرگە جالاقى تولەۋدىڭ جاڭا جۇيەسى ەنگىزىلگەنىن جەتكىزگەن. وسىلايشا، قازاق ەلىندە مەملەكەتتىك اپپاراتتىڭ تيىمدىلىگىن ارتتىرۋعا ءمان بەرىلىپ وتىر دەيدى رەپورتەر. ال «ەۆرونيۋستىڭ» رەسەيدەگى بولىمشەسى العا قويعان ماقساتقا بارىنشا ايقىن قول جەتكىزۋ كەرەك، بيلىك جۇيەلى تۇردە حالىقتىڭ الدىندا ەسەپ بەرۋى ءتيىس دەگەن ەلباسىنىڭ 5 ينستيتۋتتىق رەفورمانى ىسكە اسىرۋعا باعىتتالعان كەڭەستە ايتقان ءسوزىن مىسالعا كەلتىرگەن.

ءتىلشى ماقالا سوڭىندا قازاقستاننىڭ ۇلت جوسپارىندا 5 ءتۇرلى باسىم باعىت ايقىندالعانىن جەتكىزگەن. بەلارۋس تەلەگراف اگەنتتىگى بولسا، قازاقستان 2020 -جىلعا دەيىن تاۋار تاسىمالىن 2 ەسەگە ارتتىرسا، 10  جىلدان كەيىن 50 ميلليون تونناعا دەيىن ۇلعايتۋدى جوسپارلاپ وتىر دەپ جازدى. «بۇل رەتتە قازاقستان كوشباسشىسى مۋلتيمودالدى «ەۋرازيالىق ترانس قۇرلىقتىق ءدالىزىن» قۇرۋ جوباسى باستالعانىن ەسكە سالعان. ول جۇكتەردىڭ كەدەرگىسىز ترانزيتىن قامتاماسىز ەتەدى» دەلىنگەن ماقالادا. ەلىمىزدىڭ ەكونوميكالىق دامۋعا باعىتتالعان جوسپارى دا شەتەلدىك باسىلىمداردا كورىنىس تاپتى. ماسەلەن، «پرايم» اقپاراتتىق اگەنتتىگى «قازاقستان وڭدەۋشى ونەركاسىپكە ينۆەستيتسيا قۇياتىن كەم دەگەندە 10 ءتۇرلى ترانسۇلتتىق كورپوراتسيانى تارتۋدى جوسپارلاپ وتىر» دەپ مالىمدەدى. ءتىپتى قازىردىڭ وزىندە 26 ترانسۇلتتىق كورپوراتسيامەن كەلىسسوز جۇرگىزە كەلە، ولاردىڭ بىرقاتارىمەن ناقتى كەلىسىمگە قول جەتكىزدى دەپ ەلباسىنىڭ ماقالاسىنا توقتالىپ وتكەن.