ىنتالاندىرۋشى قادام ارقىلى مەملەكەتتىك قىزمەتكەرلەر وزدەرىن ءاردايىم جەتىلدىرۋگە تىرىسادى - گ. قاراقۇسوۆا

بۇل تۋرالى «قازاقپارات» تىلشىسىنە بەرگەن سۇحباتىندا پارلامەنت ءماجىلىسىنىڭ دەپۋتاتى گۇلجان قاراقۇسوۆا ءمالىم ەتتى.

 «پرەزيدەنت ماقالاسىندا ناتيجەلى قىزمەت ءۇشىن مەملەكەتتىك قىزمەتكەرلەرگە بونۋس بەرۋ تاقىرىبىنا توقتالدى. مەنىڭ ويىمشا، بۇل جاقسى شەشىم جانە وسى قادام مىندەتتى تۇردە وڭ ناتيجە بەرەدى. سەبەبى، ادامي جانە ەكونوميكالىق تۇرعىدا دۇرىس شەشىم. جاقسى جۇمىس بىلىكتىلىگىمەن كوزگە كورىنگەن ادامعا بۇل قولداۋ بولادى. مەملەكەت قىزمەتكەردى جۇمىسقا قابىلداعان كەزدە ءبىرىنشى كەزەكتە قىزمەتىنە ساي كەلەتىن ادامدى قابىلداۋ كەرەك ەكەنى بەلگىلى. سوندىقتان دا جۇمىستا جاقسى ناتيجە كورسەتكەن ادامدى ىنتالاندىرۋ كەرەكتىگىنە ەشكىم دە قارسى ءسوز ايتا المايتىنى انىق»، - دەدى ول.

وسى ورايدا دەپۋتات ىنتالاندىرۋشى قادام بولعان جاعدايدا قىزمەتكەرلەر وزدەرىن ءاردايىم جەتىلدىرۋگە تىرىساتىنىن اتاپ ءوتتى.

«مەملەكەتتىك قىزمەتكەر حالىققا قىزمەت ەتەدى. سوندىقتان قىزمەتكەرلەر وزدەرىنىڭ جۇمىسىندا جاقسى ءارى جوعارى ناتيجەلەر كورسەتۋگە مىندەتتى»، - دەپ ءتۇيدى گۇلجان قاراقۇسوۆا.

 ايتا كەتەيىك، اقوردا مەملەكەت باسشىسى نۇرسۇلتان نازاربايەۆتىڭ «ۇلت جوسپارى - قازاقستاندىق ارمانعا باستايتىن جول» ماقالاسىن جاريالادى.

 «مەملەكەتتىك قىزمەتكە ورنالاسۋ تەك كەشەندى ىرىكتەۋ مەن جۇمىستى تەك تومەنگى لاۋازىمداردان باستاۋدىڭ ناتيجەلەرى بويىنشا مۇمكىن بولادى. جۇمىس تاجىريبەسى مەملەكەتتىك قىزمەتشىنىڭ مانساپتىق ىلگەرىلەۋىنىڭ باستى شارتى بولادى جانە مۇندا دا تەك كونكۋرستىق نەگىزدە جۇزەگە اسىرىلادى. سونداي- اق، جەكەلەگەن مەملەكەتتىك قىزمەتشىلەر روتاتسيالارىنىڭ مۇمكىندىگى كولبەۋىنەن جانە تىگىنەن ولاردى قىزمەتتىك باسپانامەن قامتاماسىز ەتە وتىرىپ قاراستىرىلعان.

ەكىنشىدەن، مەملەكەتتىك قىزمەتكە اشىق كونكۋرس ارقىلى جانە كادر ساياساتى جونىندەگى ۇلتتىق كوميسسيانىڭ شەشىمى بويىنشا كەلىسىمشارتتىق نەگىزدە مەملەكەتتىك ەمەس سەكتورداعى باسقارۋشىلار قاتارىنان ازاماتتار جانە شەتەلدىك مەنەدجەرلەر تارتىلا الادى.

ۇشىنشىدەن، مەملەكەتتىك قىزمەتشىگە ەڭبەكاقى تولەۋدىڭ جاڭا جۇيەسى ونىڭ بىلىكتىلىگى مەن اتقاراتىن جۇمىسىنىڭ سيپاتىنا، كولەمى مەن ناتيجەسىنە بايلانىستى زاڭ تۇرعىسىنان بەكىتىلەدى. اسا ناتيجەلى قىزمەت ءۇشىن بونۋستار تولەۋ قاراستىرىلعان. مۇنداي جۇيەنى 2017 -جىلدىڭ 1 - قاڭتارىنان باستاپ ەنگىزۋ جوسپارلانىپ وتىر. بۇل جەردە 2016 - جىلى بۇگىندە «ب» كورپۋسىنا كىرەتىن مەملەكەتتىك قىزمەتشىلەردىڭ ەڭبەكاقىسى جوعارىلايتىنىن ايتا كەتۋ كەرەك»، - دەپ اتاپ وتىلگەن ق ر پرەزيدەنتىنىڭ ماقالاسىندا.

اۆتور: رۋسلان عابباسوۆ