جەمقورلىق پەن تۇتاستاي ءبىر حالىق بولىپ كۇرەسپەسەك، ونىڭ تامىرى كەسىلمەيدى - مەملەكەت باسشىسى
بۇل تۋرالى قازاقستان تەلەارنالارىنا بەرگەن سۇحباتىندا مەملەكەت باسشىسى نۇرسۇلتان نازاربايەۆ ءمالىم ەتتى.
«مەملەكەتتىك شەنەۋنىكتىڭ موينىنا بيزنەس اتقارۋى ءتيىس وتە كوپ جۇمىس جۇكتەلگەن. ياعني، رۇقسات بەرۋ ماسەلەسىندە. مىسالى، جەر ساتىپ الۋ ءۇشىن قالىڭ قاعازدىڭ اراسىنا كىرگەن ادام «قول قويدىرۋ ءۇشىن بىردەڭە بەرۋ كەرەك شىعار» دەگەن ويعا كەلەدى. بۇل تۋرالى ءسوز قوزعالعان سايىن مەنىڭ ۇنەمى ايتاتىن ءسوزىم، حالىققا قوياتىن ساۋالىم بىرەۋ: «نەگە بەرەسىزدەر؟». پارا الۋشى بار دا، پارا بەرۋشى بار. حالىق وسىنى كورىپ، نەگە اقپاراتتاندىرمايدى؟ قورقادى دەپ ايتۋعا بولادى. سوندىقتان جەمقورلىقپەن تۇتاستاي ءبىر حالىق بولىپ كۇرەسپەسەك، ونىڭ تامىرى كەسىلمەيدى. بۇل دا ءبىر مادەنيەت. جەمقورلىق بۇكىل ەلدە كەزدەسەدى، جەمقورلىقتى 100 پايىز جەڭگەن ەل جوق. ءبىراق جەمقورلىقپەن كۇرەستە جاقسى كورسەتكىشكە قول جەتكىزگەن ەلدەر بار، كورسەتكىشى ناشار ەلدەر بار»، - دەگەن ن. نازاربايەۆ ءبىر اپتا بۇرىن ءوزى قول قويعان جاڭا زاڭنىڭ باسىمدىقتارىنا توقتالدى.
«ءبىر اپتا بۇرىن مەن «جەمقورلىققا قارسى كۇرەس تۋرالى» جاڭا زاڭعا قول قويدىم. ءبىز الەمدىك تاجىريبەنى باسشىلىققا الا وتىرىپ، ءبىراز ماسەلەلەردى، ءتىپتى، سىيلىق بەرۋ ماسەلەسىن ناقتىلادىق. ەگەر بىرەۋدەن سىيلىق العىڭ كەلسە، وندا سول سىيلىقتى ساتىپ ال، تەگىن كەلسە، مەملەكەتكە قايتار. ياعني، زاڭ نورماسى ۇستەمدىك قۇرۋ كەرەك.
ەكىنشىدەن، ەلەكتروندى ۇكىمەتتى دامىتۋ ماسەلەسى. ياعني، شەنەۋنىك پەن كاسىپكەر اراسىندا تىكەلەي بايلانىس بولمايدى. قاتەلەسپەسەم، كاسىپكەرلەر قازىر كەرەك انىقتامالارىنىڭ 70 پايىزدان استامىن ەلەكتروندى تۇردە الا الادى. ياعني، شەنەۋنىكپەن تىكەلەي بايلانىسقا شىقپايدى. وسى ءىستى، قۇجات اينالىمىنىڭ بارلىعىن، رۇقسات بەرۋ پروتسەستەرىنىڭ بارلىعىن ەلەكتروندى فورماتقا اۋىستىرۋ كەرەك»، - دەدى ەلباسى.
اۆتور: كەنجەكەي توقتامۇرات قىزى
