تەڭگە باعامىنىڭ وزگەرۋى ارەندالىق باسپانا قۇرىلىسى مەرزىمىنە ەش اسەر ەتكەن جوق - ق. بيشىمبايەۆ
بۇل تۋرالى بۇگىن ق ر ۇكىمەتىنىڭ سەلەكتورلىق رەجىمدەگى وتىرىسى بارىسىندا «بايتەرەك» ۇ ب ح باسقارماسىنىڭ ءتوراعاسى قۋاندىق بيشىمبايەۆ ءمالىم ەتتى.
ونىڭ اتاپ وتۋىنشە، اعىمداعى جىلى تۇرعىن ءۇي- قۇرىلىس جيناق بانكى اياسىندا جەرگىلىكتى اكىمدىكتەرمەن بىرلەسىپ، 507 مىڭ شارشى مەتر ءۇي سالىناتىن بولادى. مۇنان بولەك قازاقستان يپوتەكالىق كومپانياسى مەن تۇرعىن ءۇي- قۇرىلىس جيناق بانكىن قوسا العاندا، «بايتەرەك» حولدينگى جەلىسىندە 929 مىڭ شارشى مەتر پاتەر پايدالانۋعا بەرىلەدى،
«ءبىزدىڭ بارلىق نىساندارداعى قازاقستاندىق قامتۋ كولەمى كەمىندە 80 پايىزدى قۇرايدى. تاياۋداعى ۇلتتىق ۆاليۋتا باعامىنىڭ وزگەرۋى قۇرىلىس مەرزىمدەرىنە ەش اسەر ەتكەن جوق. ويتكەنى، قازاقستاندىق قۇرىلىس ماتەريالدارىنىڭ ۇلەسى وتە جوعارى»، - دەدى ول.
سونىمەن قاتار ق. بيشىمبايەۆ 2015 - جىلى قۇرىلىس جۇمىستارى بارىسىندا 21 مىڭ قوسىمشا جۇمىس ورنى قۇرىلعانىن باسا ايتتى.
اۆتور: مارلان جيەمباي
