د س ۇ- عا كىرگەننەن كەيىن قازاقستانعا نارىقتىق ەكونوميكاسى بار ەل مارتەبەسى بەرىلۋى مۇمكىن - ج. ايتجانوۆا

استانا. قازاقپارات - ق ر سىرتقى ىستەر مينيسترلىگىندە ق ر ەكونوميكالىق ينتەگراتسيا ىستەرى ءمينيسترى جانار ايتجانوۆا مەن ديپلوماتيالىق كورپۋستىڭ قاتىسۋمەن قازاقستان رەسپۋبليكاسىنىڭ دۇنيەجۇزىلىك ساۋدا ۇيىمىنا كىرۋى تاقىرىبىندا دوڭگەلەك ۇستەل وتىرىسى ءوتتى.

ق ر س ءى م باسپا ءسوز قىزمەتىنىڭ حابارالۋىنشا، شارا بارىسىندا ەلىمىزدىڭ سىرتقى ىستەر ۆيتسە-ءمينيسترى الەكسەي ۆولكوۆ 2015-جىلدىڭ 15-18- جەلتوقسان كۇندەرى نايروبيدە وتەتىن 10- مينيسترلەر كەزدەسۋىندە قازاقستاننىڭ د س ۇ- عا تولىققاندى قۇقىعى بار مۇشەسى رەتىندە قاتىساتىندىعىن اتاپ ءوتتى.

ونىڭ پايىمىنشا، بۇل ساپالى دەڭگەيدەگى ساۋدا جانە ينۆەستيتسيا سالاسىنداعى ىنتىماقتاستىقتى ودان ءارى دامىتۋعا دايىن ءبىزدىڭ ەلىمىزدىڭ الەمدىك قوعامداستىقپەن بارىنشا تەرەڭ ينتەگراتسيالانۋىنا، ونىڭ ەكونوميكانى رەتتەۋدەگى اشىق رەجىمىنە كىرىگۋگە سەپتىگىن تيگىزىپ، ەكونوميكامىزدىڭ دامۋىنا تىڭ سەرپىن بەرەدى.

ءمينيستردىڭ ورىنباسارى د س ۇ- نىڭ جەكەلەگەن باعىتتارى بويىنشا حالىقارالىق ساۋدا قۇقىعى ماسەلەلەرى جانە تەحنيكالىق ماماندار دايىنداۋ ماسەلەسىنە باسا نازار اۋدارىپ، مۇشەلىكتىڭ باستاپقى كەزەڭىندە بۇل ماسەلەگە د س ۇ ەلدەرى وكىلدەرىنىڭ كومەكتەسۋىن ءوتىندى.

«بۇل سالالارداعى مامانداردىڭ ساپالى دەڭگەيىن دايىنداۋ ناتيجەسى باسەكەگە قابىلەتىلىك جانە ينۆەستيتسيا قۇيىلۋى مەن بيزنەس جۇرگىزۋ ءۇشىن ورتانىڭ بولجامدىعى بولىگىندەگى قازاقستان رەيتينگىسىنىڭ كوتەرىلۋى بولماق»، - دەدى ا. ۆولكوۆ.

سونىمەن قاتار ول ەۋروپالىق وداقتىڭ شەتەل ىستەرى جونىندەگى جوعارى وكىلى فەدەريكي موگەرينيدىڭ اعىمداعى جىلدىڭ جەلتوقسان ايىندا ەلىمىزگە ساپارى اياسىندا ق ر مەن ە و اراسىنداعى سەرىكتەستىك پەن ىنتىماقتاستىقتى كەڭەيتۋ تۋرالى كەلىسىمگە قول قويۋ جوسپارلانىپ وتىرعانىن جانە ونىڭ ە و- مەن ءوزارا ءىس-قيمىلدى جاڭا دەڭگەيگە كوتەرەتىندىگىن اتاپ ءوتتى.

«اتالعان كەلىسىم ىسكە قوسىلعاننان كەيىنگى ە و- مەن ىنتىماقتاستىقتى دامىتۋدىڭ باسىمدىقتى مىندەتى بىزدەر ءۇشىن ۆيزالىق رەجىمدى جەڭىلدەتۋ بولماق»، - دەدى ا. ۆولكوۆ.

مينيستر ج. ايتجانوۆا ءوز سوزىندە قازاقستاننىڭ د س ۇ- عا كىرۋ شارتتارى جانە ەلىمىز ۇيىمعا كىرگەننەن كەيىن شەتەلدىك ينۆەستورلار ءۇشىن اشىلاتىن مۇمكىنشىلىكتەر تۋرالى كەڭىنەن ايتىپ بەردى.

سونىمەن قاتار ول قازاقستانعا نارىقتىق ەكونوميكاسى بار ەل مارتەبەسى بەرىلۋى مۇمكىن ەكەندىگىن ءمالىم ەتتى.

«قارجىلىق قىزمەتتەرگە قاتىستى ءبىز شەتەلدىك بانكتەر مەن ساقتاندىرۋ كومپانيالارىنا ق ر د س ۇ- عا كىرگەننەن كەيىن 5 جىلدىڭ ىشىندە بانكتەر ءۇشىن دە، ساقتاندىرۋ كومپانيالارى ءۇشىن دە تىكەلەي فيليالدار اشۋ مۇمكىندىگىن بەرەمىز»، - دەدى مينيستر.

سونداي-اق ج. ايتجانوۆا كولىك، ەنەرگەتيكا، تەلەكوممۋنيكاتسيا، قارجى جانە ساۋدا سىندى ەكونوميكانىڭ باستى سەكتورلارىن ىرىقتاندىرۋ جايىندا دا ايتتى.

اۆتور: مارلان جيەمباي