ءبىز گۇلدەنگەن اۋعانستانمەن جاقىن قارىم-قاتىناس ورناتقىمىز كەلەدى - ن. نازاربايەۆ

استانا. قازاقپارات - ەلباسى نۇرسۇلتان نازاربايەۆ قازاقستانعا رەسمي ساپارمەن كەلگەن اۋعانستان يسلام رەسپۋبليكاسىنىڭ پرەزيدەنتى موحامماد عانيمەن كەزدەستى، دەپ حابارلايدى اقوردانىڭ باسپا ءسوز قىزمەتىنەن.

ەكى ەلدىڭ كوشباسشىلارى ساۋدا-ەكونوميكالىق، كولىك-ترانزيتتىك، اۋىل شارۋاشىلىق جانە مادەني-گۋمانيتارلىق ىنتىماقتاستىق ماسەلەلەرىن تالقىلادى. سونداي-اق حالىقارالىق كۇن ءتارتىبىنىڭ جانە وڭىرلىك قاۋىپسىزدىكتىڭ مەيلىنشە وزەكتى جايتتارى قوزعالدى.

قازاقستان پرەزيدەنتى ءوزىنىڭ شاقىرتۋى بويىنشا ەلىمىزگە العاشقى رەسمي ساپارمەن كەلگەن م. عانيعا ءىلتيپات ءبىلدىردى.

- ورتالىق ازيا ءوڭىرى مەن اۋعانستاننىڭ ەجەلدەن ورتاق باي مادەني جانە تاريحي قۇندىلىقتارى بار. مەن ءسىزدىڭ ەلدە بولىپ جاتقان وقيعالاردى جاقسى بىلەمىن. ءبىز كەزىندە بۇرىنعى پرەزيدەنت ح. كارزايمەن كوپ ىنتىماقتاستىقتا بولدىق. قازاقستان اۋعانستاندى تۇراقتاندىرۋ ءۇشىن جان-جاقتى قولداۋ كورسەتۋدە. ءبىزدىڭ ەلگە گۇلدەنگەن اۋعانستان كەرەك، ءبىز وسىنداي ەلمەن جاقىن قارىم-قاتىناس ورناتقىمىز كەلەدى، - دەدى مەملەكەت باسشىسى.

نۇرسۇلتان نازاربايەۆ قازىرگى كەزدە اۋعانستان كەزىگىپ وتىرعان قيىندىقتار مەن تاۋەكەلدەرگە قازاقستاننىڭ تەرەڭ تۇسىنىستىكپەن قارايتىنىن ايتتى.

- سوڭعى جىلدارى تۇراقتانۋ ۇدەرىسى بايقالىپ وتىر، ءبىز بۇعان قۋانىشتىمىز. ءسىز بۇكىل حالىقتى بىرىكتىرىپ، ۇلتتىق بىرلىك ۇكىمەتىن قۇرۋعا تالپىنىپ وتىرسىز. بۇل - ماڭىزدى نيەت جانە ونى ءبىز قولدايمىز، - دەدى قازاقستان پرەزيدەنتى.

م. عاني ءوز سوزىندە ەلىمىزدىڭ تاۋەلسىزدىك جىلدارى جەتكەن تابىستارىنا نازار اۋداردى.

- ءسىز «قازاقستان-2030» ستراتەگياسىن جاريالاعانىڭىزدا، الەمدە وعان كوپ ەشكىم سەنبەدى. الايدا ءسىزدىڭ باسشىلىعىڭىزبەن جانە جان-جاقتى ءارى جەدەل قابىلدانعان شارالاردىڭ ارقاسىندا جاريا ەتىلگەن ماقساتتارعا قول جەتكىزىلىپ قانا قويماي، ولار اسىرا ورىندالدى دا. قازاقستاندا وسىلايشا جۇزەگە اسقان وزگەرىستەر بۇكىل وڭىرگە جارقىن ۇلگى بولا الادى. وسىعان بايلانىستى ءسىزدىڭ 1997-جىلى ايتقان «كەشە ءالى ەرتە بولاتىن، ال ەرتەڭ كەش بولۋى مۇمكىن» دەگەن ءسوزىڭىزدى ەسكە العىم كەلەدى، - دەدى اۋعانستان پرەزيدەنتى.