ن. نازاربايەۆ: قازاقستان ماماندارى اۋعانستان جەرىندە گەولوگيالىق بارلاۋى جۇمىستارىن جۇرگىزەدى
بۇل تۋرالى بۇگىن اقوردادا قازاقستانعا رەسمي ساپارمەن كەلگەن اۋعانستان يسلام رەسپۋبليكاسىنىڭ موحامماد اشراف عانيمەن كەلىسسوزدەردەن كەيىنگى بىرلەسكەن مالىمدەمە بارىسىندا ەلباسى نۇرسۇلتان نازاربايەۆ ايتتى.
«وسى جىلدار ىشىندە اۋعان ەلىنىڭ قيىن- قىستاۋ جاعدايىنا بايلانىستى قازاقستان ءار ۋاقىتتا دا باۋىرلىق كومەگىن كورسەتىپ وتىردى. ءبىز وسى كەزەڭ ىشىندە 20 ميلليون دوللارعا جۋىق گۋمانيتارلىق كومەك كورسەتتىك. 2 ميلليون دوللاردى اۋعانستانعا قۇقىق قورعاۋ ورگاندارىن نىعايتۋ ءۇشىن بەردىك»، - دەدى ەلباسى.
مۇنان بولەك، ق ر پرەزيدەنتى ەلىمىزدىڭ 1000 اۋعان جاسىنا جوعارى ءبىلىم بەرۋ ءۇشىن قوماقتى قارجى بولگەندىگىن ەسكە سالىپ ءوتتى.
«قولىمىزدان كەلگەن كومەكتى ءارى قاراي دا ەلدىڭ ەكونوميكاسى وركەندەۋى ءۇشىن جاساي بەرەتىن بولامىز»، - دەدى مەملەكەت باسشىسى.
ەلباسىنىڭ اتاپ وتۋىنشە، قازاقستان ماماندارى اۋعانستان جەرىندە گەولوگيالىق بارلاۋى جۇمىستارىنا اتسالىساتىن بولادى.
اۆتور: مارلان جيەمباي
