اۋعانستان پرەزيدەنتىنىڭ العاشقى رەسمي ساپارى ەكى ەلدىڭ اراسىنداعى قارىم- قاتىناستى جاڭا دارەجەگە كوتەرەدى دەپ سەنەمىن - ن. نازاربايەۆ
بۇل تۋرالى بۇگىن اقوردادا قازاقستانعا رەسمي ساپارمەن كەلگەن اۋعانستان يسلام رەسپۋبليكاسىنىڭ مۇحامماد اشراف عانيمەن كەڭەيتىلگەن قۇرامداعى كەلىسسوزدەر بارىسىندا ەلباسى نۇرسۇلتان نازاربايەۆ ايتتى.
«قۇرمەتتى پرەزيدەنت مىرزا، دەلەگاتسيا مۇشەلەرى سىزدەرگە، قازاقستانعا، قازاق ەلىنىڭ استاناسىنا قوش كەلدىڭىزدەر دەيمىن. مەنىڭ شاقىرۋىممەن كەلىپ وتىرعان ءسىزدىڭ العاشقى رەسمي ساپارىڭىز ەكى ەلدىڭ اراسىنداعى قارىم- قاتىناستى جاڭا دارەجەگە كوتەرەدى دەپ سەنەمىن. ءبىز، ۇلى دالا ەلى سىزدەرمەنەن، اۋعان ەلىمەن ءار ۋاقىتتا دا جاقسى قارىم- قاتىناستا بولامىز. ۇلكەن تاريحىمىز بار. مادەني جانە تاريحي كەزدەسۋلەرىمىز بار»، - دەدى ەلباسى.
مەملەكەت باسشىسى كونە تاريحقا ۇڭىلەر بولساق، ەكى ەلدىڭ اراسىنداعى قارىم- قاتىناس بۇدان 500 جىل بۇرىن قازاق حاندىقتارى مەن احمەد شاح بۋرانيدىڭ اراسىندا باستالعانىن اتاپ ءوتتى.
«30 جىلدان ارتىق سىزدەردىڭ ەلدەرىڭىزدە بولىپ جاتقان ازامات سوعىسى حالىقتىڭ جاعدايىن بارىنشا كۇيزەلتكەنىن بىلەمىز. سوندىقتان ءسىزدىڭ جاساپ جاتقان ۇلى جۇمىستارىڭىز اۋعان ەلىندە تىنىشتىق ورناتۋعا، مەملەكەتتى نىعايتۋعا باعىتتالعانىن ءبىز كورىپ وتىرمىز ءارى قولدايمىز. قاي كەزدە بولسا دا، قاي جەردە بولسا دا كەلىسسوزدەردە، حالىقارالىق كەزدەسۋلەردە ءبىز ءار ۋاقىتتا دا سىزدەردىڭ ەلدەرىڭىزدىڭ، اۋعانستاننىڭ العان باعىتىن قولداپ وتىرامىز. ءالى دە قولدايمىز» ، - دەدى ق ر پرەزيدەنتى.
ەلباسى وتكەن عاسىردىڭ 96- جىلى سولتۇستىك اۋعانستاندا جاعداي شيەلەنىسكەن كەزدە ورتالىق ازيا مەن رەسەيدىڭ توتەنشە كەزدەسۋى قازاقستاندا وتكەنىن ەسكە سالدى.
«سول كەزدەسۋ بىرىككەن ۇلتتار ۇيىمى قابىلداعان ارنايى قاراردىڭ قابىلدانۋىنا سەبەپ بولدى. بۇگىنگى سىزبەن جەكە جۇرگىزگەن كەلىسسوزدەرىمىزدە بارلىق ەكىجاقتى، حالىقارالىق قارىم- قاتىناستى، اۋعانستاننىڭ بولاشاعىن، ساۋدا- ساتتىق ماسەلەسىن قاراستىردىق»، - دەدى ەلباسى.
اۆتور: مارلان جيەمباي
