قازاقستان مەن اۋعانستان ءبىرقاتار ۋاعدالاستىقتارعا قول جەتكىزدى

استانا. قازاقپارات - اقوردادا قازاقستان مەن اۋعانستان پرەزيدەنتتەرىنىڭ كەلىسسوزدەرى قورىتىندىسىنا ارنالعان بىرلەسكەن بريفينگ ءوتتى.

قازاقستان پرەزيدەنتى وتكەن كەلىسسوزدەر بارىسىندا ەكى ەلدىڭ ساۋدا-ەكونوميكالىق ىنتىماقتاستىعىن اسىرەسە قازىرگىدەي 400 ميلليون دوللار شاماسىنداعى ءوزارا تاۋار اينالىمى كولەمىنىڭ جەتكىلىكسىزدىگى جاعدايىندا جانداندىرا ءتۇسۋ ماسەلەسى باستى تاقىرىپ بولعانىن اتاپ ءوتتى، دەپ حابارلايدى اقوردانىڭ باسپا ءسوز قىزمەتى.

مەملەكەت باسشىسى اۋعانستانعا 600 مىڭ توننادان استام قازاقستان استىعىن جەتكىزۋگە، سونداي-اق جول سالۋ، قۇرىلىس ماتەريالدارىمەن، لوكوموتيۆپەن جانە ۆاگوندارمەن قامتاماسىز ەتۋ ىسىندە كومەك كورسەتۋگە قاتىستى ۋاعدالاستىقتارعا قول جەتكىزىلگەنىن ايتتى.

نۇرسۇلتان نازاربايەۆ قازاقستاننىڭ اۋعانستاندى قيىن كەزدەردە ءاردايىم قولداعانىنا توقتالدى. اتاپ ايتقاندا، 2002 -جىلدان باستاپ 20 ميلليون دوللاردىڭ ازىق-تۇلىگى جەتكىزىلدى، قۇقىق قورعاۋ ورگاندارىنىڭ قىزمەتىن نىعايتۋ ءۇشىن قاراجات اۋدارىلدى جانە اۋعان ستۋدەنتتەرىنىڭ ءبىزدىڭ ەلدە ءبىلىم الۋى ءۇشىن 50 ميلليون دوللار ءبولىندى.

«ءبىز اۋعانستاننىڭ دامۋىن قامتاماسىز ەتۋ ءۇشىن قولدان كەلەتىن كومەكتى جالعاستىرا بەرەمىز»، - دەدى مەملەكەت باسشىسى.

قازاقستان پرەزيدەنتى اۋعانستاننىڭ جەر قويناۋى پايدالى قازبالارعا باي ەكەنىنە جانە گەولوگيالىق بارلاۋ جۇمىستارىنا تارتىلۋى مۇمكىن مامانداردىڭ ءبىزدىڭ ەلدە بار ەكەنىنە نازار اۋداردى.

مەملەكەت باسشىسى كەلىسسوزدەر اياسىندا ەكى ەلدىڭ ءتيىستى قىزمەتتەرىنىڭ تەرروريزمگە قارسى كۇرەستە ءوزارا ىقپالداسۋ ماسەلەلەرى تالقىلانعانىن ايتتى.

قازاقستان مەن اۋعانستان كوشباسشىلارىنىڭ حالىقارالىق قۇرىلىمدار اياسىنداعى ىقپالداستىق ماسەلەسىندەگى مۇددەلەرىنىڭ ۇندەسەتىنى دە اتاپ ءوتىلدى.

نۇرسۇلتان نازاربايەۆ ەكونوميكانى دامىتۋ جانە حالىقتىڭ ءال-اۋقاتىن تىنىشتىق پەن ءوزارا كەلىسىم نەگىزىندە ارتتىرۋ ەكى ەل ءۇشىن دە نەگىزگى باسىمدىق بولىپ سانالاتىنىنا نازار اۋداردى.

ەلباسى اۋعانستان پرەزيدەنتىنىڭ ءبىزدىڭ ەلگە ساپارى ەكىجاقتى قارىم-قاتىناستارعا پايداسىن تيگىزىپ، ىنتىماقتاستىقتى جوعارى دەڭگەيگە شىعارۋعا ىقپال ەتەتىنىنە سەنىم ءبىلدىردى.

م. عاني ءوز سوزىندە اۋعانستاننىڭ قازاقستانمەن جانە جالپى ورتالىق ازيا ەلدەرىمەن ىنتىماقتاستىققا مۇددەلى ەكەنىن راستايتىنىن اتاپ ءوتتى.

اۋعانستان پرەزيدەنتى ءوزى باسقارىپ وتىرعان ەلگە «قازاقستان جولى» تۇراقتىلىقتى نىعايتۋ جانە ەكونوميكانى دامىتۋ ىسىندە ۇلگى بولاتىنىن ايتتى.

اۋعان تاراپىنىڭ ەكى ەلدىڭ ساۋدا- ەكونوميكا، كولىك، ينۆەستيتسيا جانە ازىق-تۇلىك سالالارىنداعى ىنتىماقتاستىعى ءىس جۇزىندە تابىستى بولادى دەپ ۇمىتتەنەتىنى دە اتاپ ءوتىلدى.