كىلەم فابريكاسى ءوندىرىسىن كەڭەيتۋ جوباسىنىڭ ەكىنشى كەزەڭىن ىسكە قوستى - فوتو

استانا. قازاقپارات - وڭتۇستىك قازاقستاندىق كىلەم شىعاراتىن «بال تەكستيل» ج ش س جارتىلاي پروپيلەندى جىپتەر شىعارۋ مەن كىلەم ءوندىرىسىن كەڭەيتۋ بويىنشا ءوز جوباسىنىڭ ەكىنشى كەزەڭىن ىسكە قوستى،

 دەپ حابارلانعان «دامۋ» قورىنىڭ سايتىندا.

بۇگىندە «بال تەكستيل» ج ش س - قازاقستانداعى ءىرى كىلەم فابريكالارىنىڭ ءبىرى.

كاسىپورىن كىلەمدەر مەن «BCF», «Heat-Set» , «Frize» تاڭبالى سينتەتيكالىق جارتىلاي پروپيلەندى جىپتەردەن توقىلعان قازىرگى زامانعى كىلەمشە بۇيىمدارىن بەلگيادا جاسالعان  «MICHEL VAN DE WIELE»  قۇرىلعىسىندا توقىپ شىعارادى. ءونىم « تۇران»، «حان- ءتاڭىرى»، «ليدەر»، «الاتاۋ»، «سارى ارقا»، «بارىس»،  «ANTIQUE IMPERIAL», «ASTANA DELUXE», «VIZION», «FRIZE», «KASHAN» ،«SILK» تاڭبالارىندا شىعارىلادى. بارلىق كىلەمدەر جوعارى ساپالى ءارى باعاسى قولجەتىمدى.

«كىلەم ءوندىرىسى ءۇشىن شيكىزاتتى تۇركيادان، بانگلادەشتەن، ءۇندىستاننان، رەسەيدەن جانە ت. ب. ەلدەردەن الىپ كەلەمىز. يمپورتتاۋشىلارعا تاۋەلدى بولعان ءتيىمدى ەمەس، سوندىقتان ءبىزدىڭ كومپانيا اۋەلدەن- اق جارتىلاي پروپيلەندى جىپتەر شىعارۋدى ستراتەگيالىق جوسپارلاعان. بيىل «دامۋ» قورىنىڭ قولداۋىمەن ءوندىرىستىڭ ەكىنشى كەزەڭىن اياقتادىق. ەندى قاجەتتى جارتىلاي پروپيلەندى جىپتەر ءبىزدىڭ فابريكادا شىعارىلادى. بۇل بىزگە ءونىم باعاسىن %20 تومەندەتۋگە مۇمكىندىك بەرەدى»، - دەيدى فابريكانىڭ اتقارۋشى ديرەكتورى جومارت كەرىمشەيەۆ.

جارتىلاي پروپيلەندى سينتەتيكالىق جىپتەر فرانسيادا جاسالعان «SUPERBA»، گەرمانيادا جاسالعان «Allma Volkmann» ،«Oerlikon Neumag» فيرمالارى قۇرىلعىلارىندا شىعارىلادى.

«بال تەكستيل» كومپانياسى «دامۋ» قورىمەن جۇزەگە اسىرىلاتىن جەڭىلدىك باعدارلاماسىنىڭ شەڭبەرىندە قارجىلاندىرىلىلدى. ناتيجەسىندە كومپانيا قاجەتتى قۇرىلعىلاردى ساتىپ الىپ، وندىرىستىك ۇدەرىستى رەتكە كەلتىردى.

فابريكانىڭ وندىرىستىك قۋاتتىلىعى جىلىنا 2300-5000 مىڭ شارشى مەتر كىلەمدەر مەن كىلەمشە بۇيىمدارىنان باستاپ، 3000 توننا جارتىلاي پروپيلەندى جىپتەردى قۇرايدى. فابريكادا 200 ادام جۇمىس ىستەيدى.