احمەتجان ەسىموۆتىڭ وڭ قولى مەن ورىنباسارلارى قازىر قايدا ءجۇر؟

استانا. قازاقپارات - لاۋازىم يەسى قىزمەت اۋىستىرعاندا ونىمەن بىرگە جانىنداعى كومانداسىنىڭ دا ۇدەرە كوشۋىنە تىيىم سالىنعانى جايلى تالاي رەت ايتىلدى.

ءبىراق بۇل تالاپقا قۇلاق اساتىندار دا، قۇلاق اسپايتىندار دا بار ءتارىزدى.

بۇل تۋرالى رەيتينگ گازەتىنە سىلتەمە جاساپ oinet.kz حابارلايدى.

سودان بولار، الماتى اكىمى قىزمەتىندە 7 جىل وتىرعان احمەتجان ەسىموۆ «ەكسپو-2017» ۇلتتىق كومپانياسىنىڭ ءتوراعالىعىنا اۋىسقاندا ساراپشىلار «ەندى الماتىدان استاناعا قاراي شەنەۋنىكتەردىڭ ۇلى كوشى باستالادى» دەپ توپشىلاعان-دى.

الماتىداي الپاۋىت ءارى ەكونوميكالىق مۇمكىندىكتەرى زور مەگاپوليستى باسقارۋ ءۇشىن ەسىموۆ ءوزىنىڭ توڭىرەگىندە ايتقانىن ەكى ەتپەيتىن، سەنىمدى كوماندا قالىپتاستىرىپ ۇلگەرگەنى بەلگىلى. ەكى بىردەي ورىنباسارى سوناۋ 2008-جىلدان بەرى قىزمەت اتقارىپ كەلۋىنىڭ ءوزى ءبىراز جايدى اڭعارتادى ەمەس پە؟

ەسىموۆتىڭ كومانداسى الماتىدا قالا المايتىنىنىڭ جانە ءبىر سەبەبى -  جاڭا اكىم باۋىرجان بايبەكتىڭ كادرلىق ساياساتى. ساياسات تانۋشىلاردىڭ پىكىرىنشە، بايبەك ءالى جاس، باسقارۋشىلىق تاجىريبەسىنىڭ ازدىعىمەن قوسا قالانىڭ كوممۋنالدىق شارۋاشىلىعى، قۇرىلىس سەكىلدى كۇردەلى سالالاردان حابارى جوق.

ال ەسىموۆتىڭ تۇسىنداعى ورىنباسارلار -  قالا تىرشىلىگىن بەس ساۋساعىنداي بىلەتىن اككى شەنەۋنىكتەر. «بايبەك سولاردىڭ جەتەگىندە كەتىپ قالۋى مۇمكىن، سوندىقتان جاڭا اكىمگە ءوزى سياقتى جاس ءارى ءتىل العىش كادرلار كەرەك بولدى» دەگەن بولجام ءجيى ايتىلدى. جانە ساياسي ساۋەگەيلەر ايتقان جورامالداردىڭ ءبىرازى ورىندالدى دا.

العاشقىلاردىڭ ءبىرى بولىپ قىزمەتتەن ەربول شورمانوۆ كەتتى. ونى بىلەتىندەر ەسىموۆتىڭ وڭ قولى دەپ تە اتايتىن. ودان سوڭ يۋري يلين، زاۋرەش امانجولوۆا مەن مۇرات قۇدىشيەۆ سەكىلدى ورىنباسارلار بوسادى. ەسىموۆتىڭ كەزىندەگى اكىم ورىنباسارلارىنان قازىر جالعىز بولات ساۋرانبايەۆ قالدى.

شورمانوۆ بىردەن «ەكسپو» - عا قاراي تارتتى. قازىر ۇلتتىق كومپانيادا باسقارما ءتوراعاسىنىڭ ورىنباسارى. جالپى، باستىعىنىڭ قانداي قىزمەتكە باراتىنى شورمانوۆ ءۇشىن ءبارىبىر سياقتى. ايتەۋىر ەسىموۆ -  باستىق مارتەبەسىنەن ايىرىلماسا، شورمانوۆقا ورىنباسارلىق قىزمەت تابىلاتىنى زاڭدىلىق.

ەسىموۆتىڭ تاعى ءبىر سەنىمدى كادرى -  سەرگەي كۋيانوۆ. سوڭعى جەتى جىل بويىنا ەسىموۆتىڭ كولەڭكەسىنە اينالعانداي ەدى. ءارى باسپا ءسوز حاتشىسى، ءارى كەڭەسشىلىك قىزمەتتى قاتار اتقارعان كۋيانوۆ ءتىپتى «الماتى» تەلەارناسىنا دا تىزەسىن باتىرىپ، تىكەلەي ىقپال جۇرگىزە باستادى.

كۋيانوۆ تا بيىل تامىز ايىندا تەلەارنانى دا، كەڭەسشىلىكتى دە تاپسىرىپ، ەسىموۆتىڭ ىزىمەن استاناعا كەتۋگە اسىقتى. قازىر «ەكسپو-2017» كومپانياسىنداعى بۇكىل پيار قىزمەت قوعاممەن بايلانىس جونىندەگى دەپارتامەنتكە جەتەكشىلىك ەتەتىن كۋيانوۆتىڭ قاراماعىندا.

بۇرىنعى اكىمنىڭ ەكس-ورىنباسارلارىنا ازىرشە ەسىموۆتىڭ جاڭا قىزمەتىندەگى كومانداسىنان ورىن تابىلمادى. يۋري يليندى جۇرت «ەكسپو-2017»- گە الدىن-الا ۇزاتىپ قويىپ ەدى. الايدا، وعان پرەزيدەنت اكىمشىلىگىندەگى مەملەكەتتىك ينسپەكتور قىزمەتى بۇيىردى.

زاۋرەش امانجولوۆاعا «نۇر وتاننان» ءتاپ-ءتاۋىر قىزمەت تابىلدى. ال مۇرات قۇدىشيەۆ ازىرشە جۇمىسسىز. ساراپشىلار «ەكسپو-2017» كومپانياسىنا ەسىموۆتىڭ كادرلارى ءالى دە شوعىرلانۋ مۇمكىندىگىن جوققا شىعارمايدى.