مەملەكەتتىك قىزمەت سالاسىندا حالقارالىق تاجىريبە قازاقستان ءۇشىن وتە ماڭىزدى - ءا. بايمەنوۆ
بۇل تۋرالى بۇگىن استاناداعى «مەملەكەتتىك قىزمەتتىڭ دەربەستىگى» تاقىرىبىنداعى سەميناردا مەملەكەتتىك قىزمەت سالاسىنداعى وڭىرلىك حابتىڭ باسقارۋشى كوميتەتىنىڭ ءتوراعاسى ءاليحان بايمەنوۆ ءمالىم ەتتى.
«100 ناقتى قادام» - ۇلت جوسپارىنىڭ بەس باسىمدىعىنىڭ ءبىرى - كاسىبي دەربەس مەملەكتەتتىك اپپاراتتى قۇرۋ. وسى باعىتتاعى قوزعالىستا ساياسي مەملەكەتتىك قىزمەتشىلەر مەن كاسىبي مەملەكەتتىك اپپاراتتىڭ اراسىنداعى قارىم- قاتىناسى وتە ماڭىزدى. سوڭعى جىلدارى بۇل تاقىراپتا تەك مەملەكەتتىك قىزمەت سالاسىنداعى ماماندارعا عانا ەمەس، ۇلكەن الەۋمەتتانۋشىلار، بولاشاق جوسپارلارىن قۇرۋشىلار دا وي سالىپ ءجۇر. قازىر الەمدەگى وزىق 34 مەملەكەتتى بىرىكتىرەتىن ەكونوميكالىق ىنتىماقتاستىق جانە دامۋ ۇيىمى بار. سول ۇيىمنىڭ ءوزىنىڭ جانە وعان كىرەتىن ەلدەردىڭ تاجىريبەسى قازاقستان ءۇشىن وتە ماڭىزدى»، - دەدى ءا. بايمەنوۆ.
ايتا كەتەيىك، ەى د ۇ - استاناداعى مەملەكەتتىك قىزمەت سالاسىنداعى وڭىرلىك حابتىڭ قۇرىلتايشىسى ءارى نەگىزگى ارىپتەستەرىنىڭ ءبىرى.
«ءبىز نازاربايەۆ ۋنيۆەرسيتەتىمەن، ۇلتتىق ەكونوميكا مينيسترلىگىمەن بىرلەسە وتىرىپ، بارلىق وبلىستاردىڭ اپپارات جەتەكشىلەرىن جانە مينيسترلىكتەردەگى جاۋاپتى حاتشىلار ءۇشىن وسى دامىعان ەلدەردەگى كاسىبي مەملەكەتتىك قىزمەت قالاي جۇمىس جاسايتىنى، ءمينيستردىڭ ورىنباسارلارى، اكىم ورىنباسارلارى مەن اپپارات جەتەكشىلەرى اراسىنداعى قارىم- قاتىناس قالاي بولۋعا ءتيىس، كۇندەلىكتى مينيسترلىكتەردەگى باسقارۋدا، كۇندەلىكتى مەنەدجمەنتتە قالاي ساپانى كوتەرىپ، جۇمىس جاساتۋدىڭ جولدارى سەكىلدى ماسەلەلەردى تالقىلاپ وتىرمىز. تۇبەگەيلى كەلگەندە وسىنىڭ بارلىعى دا حالىقتىڭ ءال- اۋقاتىن جاقسارتۋعا باعىتتالۋى كەرەك. ەگەر ساياسي مەملەكەتتىك قىزمەتشىلەر مەن كاسىبي اپپارات بىرلەسىپ حالىقتىڭ مۇددەسى ءۇشىن جۇمىس ىستەسە، سوندا عانا مەملەكەتتىك اپپارات ءوزىنىڭ بولۋىن اقتايدى»، - دەدى ول.
وسى ورايدا، ءا. بايمەنوۆ مەملەكەتتىك اپپارات حالىقتىڭ ەسەبىنەن جۇمىس جاسايتىندىعىن، بۇل تۇرعىدا ەڭ وزىق ەلدەردىڭ تاجىريبەسى زەردەلەنىپ وتىرعانىن اتاپ ءوتتى.
ايتا كەتەيىك، سەمينار جۇمىسىنا ب ۇ ۇ د ب- نىڭ قازاقستانداعى تۇراقتى وكىلىنىڭ ورىنباسارى مۋنحتۋيا التانگەرەل، ە ى د ۇ مەملەكەتتىك سەكتوردى رەفورمالاۋ باسقاراماسىنىڭ باسشىسى ەدۆين لاۋ، كانادا باسقارۋ ينستيتۋتىنىڭ پرەزيدەنتى ماريانتونەتت فليۋمەن، نيدەرلاندى جوعارى مەملەكەتتىك قىزمەتىنىڭ بۇرىنعى باس ديرەكتورى يان ۆيللەم ۆەك جانە سالاداعى باسقا دا شەتەلدىك بىلىكتى ماماندار قاتىسۋدا.
اۆتور: رۋسلان عابباسوۆ
