شىمكەنتتە ەلىمىزدە تەڭدەسى جوق الىپ جىلۋ قازاندىعى پايدالانۋعا بەرىلدى
قۇرىلىسى وسىدان ءبىر جىل بۇرىن باستالعان نىسان جۋىق ارادا شىمكەنتتىكتەر ءۇشىن كادەگە جاراماق.
بۇل الىپ قازاندىق الداعى ماۋسىمدا جاڭا اكىمشىلىك ىسكەرلىك ورتالىعىن جىلۋمەن قاتار، جىلدىڭ ءتورت مەزگىلىندە ىستىق سۋمەن دە قامتاماسىز ەتە الادى. گەرمانيالىق قوندىرعىلاردىڭ قۇنى قىمبات بولعانىمەن، 3№ ەنەرگوورتالىقتىڭ قىزمەتىن تولىقتاي اتقاراتىن مۇمكىندىگى بار.
«بۇل شىمكەنت قالاسى ءۇشىن تاريحي جايت دەپ ايتۋعا بولادى. 162 گكال قازاندىق 1.5 ميلليون كۆادرات شارشى مەتر اۋماقتى جىلۋمەن تولىق قامتاماسىز ەتۋگە قاۋقارلى. قۋاتتىلىعى، جاڭا قۇرىلعىنىڭ ەسكى جىلۋ قازاندىقتارىنا قاراعاندا جىلۋ تاراتۋ كۇشى 10 ەسەگە كوپ. قازىرگى تاڭدا «قولجەتىمدى تۇرعىن ءۇي-2020» باعدارلاماسى اياسىندا پايدالانۋعا بەرىلگەن 15 تۇرعىن ءۇيدى جىلۋعا قوسۋدا»، - دەيدى شىمكەنت قالاسى اكىمىنىڭ ورىنباسارى بەيسەنبەك جانبوسىنوۆ.
ماماندار الدىمەن قازاندىقتاعى 5 جىلىتقىشتىڭ تەك ەكەۋىن عانا ىسكە قوسپاق. ولار شىمكەنت قالاسىنىڭ شىعىس بولىگىن تولىعىمەن جىلۋمەن ساپالى تۇردە قامتيمىز دەپ وتىر. ال قالعان جىلىتقىشتار قاجەتىلىككە قاراي ىسكە قوسىلادى.
بولاشاقتا شىمكەنت قالاسىندا ءدال وسىنداي تاعى ءبىر قازاندىق سالىنسا، قالا تۇرعىندارى دا، الەۋمەتتىك نىساندار دا 3№ ەنەرگوورتالىق سياقتى جەكە مەكەمەگە تاۋەلدى بولمايدى، دەپ حابارلايدى شىمكەنت قالاسى اكىمى اپپاراتىنىڭ باسپا ءسوز قىزمەتى.
