فرانسياعا ساپار ەكى ەل اراسىنداعى ىنتىماقتاستىقتى بۇرىنعىدان دا جوعارى دەڭگەيگە كوتەردى - ق ر پرەزيدەنتى
بۇل تۋرالى اقوردانىڭ باسپا ءسوز قىزمەتىنەن حابارلادى.
مەملەكەت باسشىسى بريفينگتە ساپارىنىڭ جوعارى دەڭگەيدە وتكەنىن جانە فرانسۋز تاراپى ايرىقشا قوناقجايلىق كورسەتكەنىن، بۇل - ەكى ەلدىڭ تىعىز سەرىكتەستىك ورناتىپ وتىرعانىنىڭ ايعاعى ەكەنىن اتاپ ءوتتى.
«ءبىز فرانتسيانىڭ بۇرىنعى باسشىلىعىمەن ستراتەگيالىق سەرىكتەستىك تۋرالى ۋاعدالاسقان ەدىك. بۇگىندە 34 ءىرى جوبا ىسكە اسىرىلدى، 24 ى جۇزەگە اسىرىلۋ كەزەڭىندە تۇر، كەشەگى بيزنەس فورۋمدا جاسالعان كەلىسىمشارتتار مەن كەلىسىمدەرگە سايكەس تاعى ونداعان جوبا بولاشاققا جوسپارلانعان»، - دەدى نۇرسۇلتان نازاربايەۆ.
قازاقستان پرەزيدەنتى فرانتسيانىڭ ەۋروپالىق ارەناداعى سالماقتى ورنى بار ەل ەكەنىنە، ەكونوميكانىڭ كوپتەگەن سالالارىندا، اسىرەسە اۋىل شارۋاشىلىعى سالاسىندا الدىڭعى قاتاردا كەلە جاتقانىنا نازار اۋداردى. نۇرسۇلتان نازاربايەۆ اگرارلىق سەكتورداعى بىرلەسكەن جوبالار جونىندە جاسالعان ۋاعدالاستىقتاردىڭ ءبىزدىڭ ەل ءۇشىن زور ءمانى بار ەكەنىن دە ايتتى.
«ءبىز ماشينا جاساۋ، حيميا يندۋسترياسى، ەنەرگەتيكا، ءبىلىم جانە مەديتسينا سالالارىندا دا ىنتىماقتاساتىن بولامىز. يندۋستريالىق جانە ينفراقۇرىلىمدىق باعدارلامالاردى جۇزەگە اسىرۋ ىسىنە ۇلىبريتانيانىڭ دا، فرانسيانىڭ دا اتسالىسقانى ءبىز ءۇشىن اسا ماڭىزدى. وسى ساپار جانە ونىڭ بارىسىندا وتكەن كەلىسسوزدەر ەلدەرىمىزدىڭ اراسىنداعى ىنتىماقتاستىقتى بۇرىنعىدان دا جوعارى دەڭگەيگە كوتەردى»، - دەدى مەملەكەت باسشىسى.
