قازاقستاندا ەلەكتروندى سوت تورەلىگى ەنگىزىلۋدە
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا جوعارى سوت سۋدياسى ۇلبولسىن سۇلەيمەنوۆا ءمالىم ەتتى.
«ۇلت جوسپارىنىڭ 20-قادامىن ورىنداۋ ماقساتىندا جوعارى سوت ەلەكتروندى ءادىل سوت جۇيەسىن دامىتۋدا قىرۋار شارالار جاسالىپ كەلەدى. سوت وندىرىسىنە جاڭا تەحنولوگيالار ەنگىزىلىپ جاتىر. بۇل ءوز كەزەگىندە سوت پروتسەسسىن جەدەلدەتىپ، تەز ارادا شەشىلۋىنە ىقپال ەتەدى، سوت بارىسى تۋرالى ازاماتتاردى حابارلاندىرۋ وڭاي جۇرەدى، قاعازباستىلىق ازايادى، پروتسەسسۋالدىق بايلانىستاردى ازايتادى. ارىزدار جانە وزگە دە قۇجاتتار ەلەكتروندى فورماتتا قابىلدانادى»، - دەدى ۇ. سۇلەيمەنوۆا.
ونىڭ سوزىنە قاراعاندا، ءاربىر قازاقستاندىق ەلەكتروندى كىلت ارقىلى سوت كابينەتىنە كىرىپ، ءوز ءىسىن قاشىقتىقتا قاداعالاپ وتىرا الادى.
«بارلىق شەشىمدەر جاريالانادى، ترانسپارەنتتىك وتە جوعارى جانە ءاربىر ازامات ءوزىنىڭ ءىسى قاي كەزەڭدە تۇرعاندىعىن كورىپ، سوت تاجىريبەسىمەن، حاتتامامەن جانە سوت شەشىمىمەن تانىسا الادى. سوت پروتسەسسىندە دالەلدەر بەينە- بايلانىس ارقىلى دا قارالادى»، - دەدى ۇلبولسىن سۇلەيمەنوۆا.
اۆتور: جاسۇلان جولدىبايەۆ
