ق. توقايەۆ الماتىدا ايماقتىق حاب نەگىزىندە ب ۇ ۇ گۋمانيتارلىق قۇرىلىمدارىنىڭ قىزمەتىن كەڭەيتۋدى ۇسىندى
سەنات ءتوراعاسى ب ۇ ۇ- عا قاتىستى قازاقستاننىڭ كوزقاراسى تۋرالى جۇزدەسۋشىگە جان-جاقتى اڭگىمەلەدى.
«قازاقستان ايماقتىق قاۋىپسىزدىكتى قامتاماسىز ەتۋدە ەلەۋلى ءرول اتقارا وتىرىپ، گۋمانيتارلىق سالاداعى حالىقارالىق ىنتىماقتاستىقتى ەداۋىر ۇلعايتتى، ول اۋعانستان، سيريا، پاكىستان، ورتالىق ازيا ەلدەرى جانە وزگە ءبىرقاتار مەملەكەتتەرگە كومەك بەرۋدە كورىنىس تاپتى»، - دەدى ول. قازاقستان پارلامەنتى جوعارعى پالاتاسىنىڭ ءتوراعاسى الماتىدا ايماقتىق حاب نەگىزىندە ب ۇ ۇ گۋمانيتارلىق قۇرىلىمدارىنىڭ قىزمەتىن كەڭەيتۋدى ۇسىندى.
ءتوراعا سونداي-اق ب ۇ ۇ وكىلىنە ءبىزدىڭ ەلىمىزدەگى رەفورمالار تۋرالى ايتتى جانە كورنەكتى رەفورماتور، يادرولىق قارۋدى تاراتپاۋعا ءارى حالىقارالىق قاۋىپسىزدىكتى نىعايتۋعا زور ۇلەس قوسقان مەملەكەت قايراتكەرى رەتىندە شەت ەلدەردە جاقسى بىلەتىن ەلباسىنىڭ كوشباسشىلىق ءرولىن اتاپ ءوتتى. ق. توقايەۆ الەمدىك جانە ءداستۇرلى دىندەر ليدەرلەرىنىڭ سەزى تۋرالى جۇزدەسۋشىنى ەگجەي-تەگجەيلى حاباردار ەتتى.
ا. ال- ماتۋك ب ۇ ۇ باس حاتشىسى پان گي مۋننىڭ ىزگى تىلەكتەرىن جەتكىزدى جانە يادرولىق قارۋدى تاراتپاۋ، حالىقارالىق قاۋىپسىزدىكتى نىعايتۋ مەن ءدىنارالىق ءۇنقاتىسۋدى دامىتۋ سالاسىنداعى پرەزيدەنت ن. نازاربايەۆتىڭ حالىقارالىق كۇش-جىگەرىنە قولداۋ ءبىلدىردى.
ب ۇ ۇ باس حاتشىسىنىڭ وكىلى شيەلەنىس سالدارىنان اۋقىمى زور گۋمانيتارلىق اپاتقا ۇشىراعان سيرياعا كومەك كورسەتۋ ءۇشىن دونورلاردىڭ ءتورتىنشى كونفەرەنتسياسىنا ازىرلىك تۋرالى حابارلادى. كۋۆەيت ەميرىنىڭ شتاتتان تىس كەڭەسشىسى بولىپ تابىلاتىن ا. ال-ماتۋك تاياۋ ارادا سيريا بوسقىندارى 15 ميلليونعا جەتۋى ىقتيمال دەپ سانايدى.
24- قازاندا اتالىپ وتەتىن ب ۇ ۇ- نىڭ 70 جىلدىعى قارساڭىندا جۇزدەسۋشىلەر حالىقارالىق وزەكتى ماسەلەلەردى رەتتەۋدەگى وسى امبەباپ ۇيىمنىڭ جەتەكشى ءرولىن نىعايتۋدىڭ ماڭىزدىلىعىن اتاپ ءوتتى.
اۆتور: سەرىك قاراجان
