قازاق-قىتاي قوعامداستىعىن قۇرۋ - ەكى ەلدىڭ ستراتەگيالىق تاڭداۋى - ن. نازاربايەۆ

بەيجىڭ. قازاقپارات - ق ر پرەزيدەنتى نۇرسۇلتان نازاربايەۆ قىتاي كوممۋنيستىك پارتياسى ورتالىق كوميتەتى جانىنداعى ورتالىق پارتيا مەكتەبىندە ءدارىس وقي وتىرىپ، قازاقستاننىڭ سىرتقى ساياساتىنداعى باسىم باعىتتىڭ ءبىرى - قىتاي حالىق رەسپۋبليكاسىمەن دوستىق قارىم- قاتىناستى نىعايتۋ ەكەنىن اتاپ ءوتتى.

«وسى ۋاقىت ىشىندە قازاقستان مەن قىتاي جىلدار بويى شەشىمىن تاپپاي كەلگەن ماسەلەلەردى شەشتى. اتاپ ايتساق، ۇزىندىعى 1700 شاقىرىم شەكارانى قاراما- قايشىلىقتىڭ شەكاراسى ەمەس، دوستىق پەن ىنتىماقتاستىقتىڭ شەكاراسىنا اينالدىردىق. الەمدىك دەڭگەيدەگى بىرلەسكەن باستامالار، ەكونوميكالىق ىنتىماقتاستىق، قانداي ماسەلەدە بولماسىن ءوزارا تۇسىنىستىك پەن دوستىقتى ساقتاي ءبىلۋىمىز، «ءۇش زۇلىمدىققا» قارسى كۇرەسىمىز - ءبىزدىڭ ەلدەرىمىزدى جاقىنداستىرىپ، مەملەكەتتەرىمىز اراسىنداعى سەنىمدى نىعايتتى. جانە ءبىز بۇل جولدى ءارى قاراي دا جالعاستىرا بەرەمىز. قىتاي حالىق رەسپۋبليكاسىمەن جاقسى كورشى جانە دوستىق قارىم- قاتىناستى نىعايتۋ - قازاقستاننىڭ سىرتقى ساياساتىنداعى باسىم باعىتتاردىڭ ءبىرى»، - دەدى ق ر پرەزيدەنتى.

مەملەكەت باسشىسى ن. نازاربايەۆ اتاپ وتكەندەي، ەكى ەل ەڭ الدىمەن جىبەك جولىنىڭ ەكونوميكالىق بەلدەۋى جانە 21 -عاسىرداعى تەڭىز جىبەك جولى اياسىندا ىنتىماقتاستىق ورناتۋ ءۇشىن ازيا مەن بۇكىل الەمگە مۇمكىندىك بەرۋگە بىرلەسە كۇش جۇمسايدى.

«تاعدىرلاس قازاق- قىتاي قوعامداستىعىن قۇرۋ - مەملەكەتتەردىڭ تۇپكى مۇددەسىنە ساي ەكى ەلدىڭ دە ستراتەگيالىق تاڭداۋى. سوندىقتان، جارقىن بولاشاق پەن گۇلدەنۋگە بىرگە قادام باسايىق»، - دەدى ءسوزىن تولىقتىرعان ن. نازاربايەۆ.

ەستەرىڭىزگە سالا كەتەيىك، ق ر پرەزيدەنتى نۇرسۇلتان نازاربايەۆتىڭ قىتايعا مەملەكەتتىك ساپارى 3 -قىركۇيەككە دەيىن جالعاسادى. ەرتەڭ ەلباسى قىتاي حالقىنىڭ جاپونيا باسىپ الۋشىلارىمەن بولعان سوعىستاعى جەڭىسىنىڭ 70 جىلدىعىنا ارنالعان سالتاناتتى پارادىنا قاتىسادى.

اۆتور: كەنجەكەي توقتامۇرات قىزى