ق. توقايەۆ: پرەزيدەنت رەفورمالارىن زاڭنامالىق تۇرعىدا قامتاماسىز ەتۋ باسىم باعىت

استانا. قازاقپارات - قازاقستان رەسپۋبليكاسىنىڭ بەسىنشى شاقىرىلعان پارلامەنتىنىڭ بەسىنشى سەسسياسىنىڭ اشىلۋىنا وراي سەنات ءتوراعاسى قاسىم-جومارت توقايەۆ مەملەكەت باسشىسى نۇرسۇلتان نازاربايەۆتىڭ ينستيتۋتتىق رەفورمالارىن زاڭنامالىق تۇرعىدا قامتاماسىز ەتۋ ماسەلەلەرى بويىنشا جوعارعى پالاتانىڭ بيۋرو مۇشەلەرى جانە اپپاراتىنىڭ باسشى قىزمەتكەرلەرىمەن كەڭەس وتكىزدى.

«جۋىردا وتكەن كونستيتۋتسيانىڭ 20 جىلدىعىنا ارنالعان حالىقارالىق كونفەرەنسيادا سويلەگەن سوزىندە پرەزيدەنت الداعى ءۇش-ءتورت جىل ىشىندە ۇلت جوسپارىن زاڭنامالىق قامتۋ ماقساتىندا جەتپىستەن استام زاڭ قابىلداۋ جوسپارلانىپ وتىرعانىن، ونىڭ ىشىندە، جىل سوڭىنا دەيىن 57 زاڭ قابىلداۋ قاجەتتىگىن ايتىپ ءوتتى»، - دەدى ق. توقايەۆ.

قالىپتاسقان ەرەكشە احۋالعا وراي ق. توقايەۆ جەدەلدىكتى جانە زاڭداردى جوعارى ساپادا قابىلداۋدى قامتاماسىز ەتۋ ءۇشىن سەنات كوميتەتتەرىن ءماجىلىستىڭ ءتيىستى كوميتەتتەرىمەن جانە زاڭ جوبالارىن ازىرلەگەن مينيسترلىكتەرمەن ىنتىماقتاسا قويان- قولتىق جۇمىس ىستەۋگە شاقىردى. ءتوراعا سونداي- اق پالاتانىڭ قوسىمشا وتىرىستارىن وتكىزۋ مۇمكىندىكتەرى تۋرالى دا ايتتى. سوندىقتان، سەناتورلاردى كاسىبي بىلىكتىلىكتى، ىجداعاتتىلىق پەن جاۋاپتىلىقتى تالاپ ەتەتىن اۋقىمدى زاڭ شىعارۋ جۇمىستارى كۇتىپ تۇر.

سەنات اپپاراتىنا دەپۋتاتتاردىڭ زاڭنامالىق قىزمەتىن جەدەل ءارى ساپالى قۇقىقتىق، اقپاراتتىق، ۇيىمداستىرۋشىلىق جانە قۇجاتتامالىق جاعىنان قامتاماسىز ەتۋ تاپسىرىلدى.

زاڭ جوبالارىمەن جۇمىسقا باسىمدىق بەرىلەتىنى ەسكەرىلە وتىرىپ، كوميتەتتەردىڭ كوشپەلى وتىرىستارى مەن دەپۋتاتتاردىڭ ءىسساپارلارىن قايتا ۇيلەستىرۋ تۋرالى ۇسىنىس ايتىلدى.

جاڭا پارلامەنتتىك سەسسيادا سەناتتىڭ العاشقى وتىرىسى 3 -قىركۇيەكتە وتەدى.

اۆتور: سەرىك قاراجان