ن. نازاربايەۆ: ءبىز ءۇشىن قىتاي - وسىناۋ قيىن كەزەڭدەگى زور سۇيەنىش

بەيجىڭ. قازاقپارات - مۇنايدىڭ الەمدىك باعاسىنىڭ قۇلدىراۋى جانە جاھاندىق ەكونوميكا ءوسىمىنىڭ قارقىنى باياۋلاعان جاعدايىندا قىتايمەن ىنتىماقتاستىق قازاقستان ءۇشىن زور مانگە يە.
None
None

 بۇل تۋرالى بۇگىن قىتايدىڭ ىسكەر جانە قارجىلىق توپتارى وكىلدەرىمەن جۇمىس بابىنداعى تاڭەرتەڭگى استان كەيىن قازاقستاندىق جۋرناليستەرگە باسپا ءسوز ءماسليحاتىن وتكىزگەن ق ر پرەزيدەنتى نۇرسۇلتان نازاربايەۆ ايتتى.

«بۇل ساپار ءبىزدىڭ قىتاي حالىق رەسپۋبليكاسىمەن ىنتىماقتاستىعىمىزدىڭ ماڭىزدى، قۋاتتى ەكىنشى كەزەڭى رەتىندە ۇلكەن مانگە يە. الەمدە داعدارىس ءجۇرىپ، الەمدىك قارجى ينستيتۋتتارىنىڭ قارجىلىق مۇمكىنشىلىكتەرى تارىلا تۇسكەن ساتتە بىزدەر ءۇشىن قىتاي - وسى كۇردەلى داعدارىس جاعدايىنان شىعۋدىڭ زور جولى، زور سۇيەنىشى» ، - دەدى مەملەكەت باسشىسى.

«ءبىز قازىرگى ۋاقىتتا ءبىزدىڭ ەكسپورتتىق ونىمدەرىمىزدىڭ، اسىرەسە مۇنايدىڭ باعاسىنىڭ تومەندەۋىنەن زارداپ شەگۋدەمىز. بۇگىن 53 دوللار بولدى. باعاسىنىڭ ءوسۋى قۋانتادى. ءبىراق، مۇنىڭ بارلىعى قۇبىلمالى. ارينە، بۇل ءبىزدىڭ بيۋدجەت تۇسىمدەرىمىزدى قاتتى قىسقارتىپ جىبەردى. ەكىنشىدەن، رەسەي مەن ەۋروپا اراسىنداعى سانكتسيا دا ءوز ىقپالىن تيگىزبەي قويمادى. رەسەي بىزدەر ءۇشىن - ۇلكەن نارىق. بىزگە تىكەلەي اسەر ەتپەيدى، ءبىراق، ءبىز زارداپ شەگۋدەمىز جانە ءبىزدىڭ تەڭگەگە قاتىستى شارامىز بارلىعىمىز ءۇشىن قاجەتتى قورعانىس شاراسى بولدى. مەنىڭ ويىمشا، حالىق مۇنى دۇرىس ءتۇسىندى جانە مەن سول ءۇشىن ريزاشىلىق تانىتامىن» ، - دەپ قوستى ەلباسى.

ق ر پرەزيدەنتىنىڭ اتاپ وتۋىنشە، وسى جولعى ق ح ر- عا ساپارى بارىسىندا 45 جوبانىڭ 23 ميلليارد دوللاردى قۇرايتىن 25 ىنە قول قويىلاتىن بولادى.

 «ماسەلەن، قازىر ءبىز پاۆلوداردا 250 مىڭ توننا مەتالل اليۋميني جاسايمىز، وعان تاعى 150 مىڭ توننا قوسىلاتىن بولدى. قوستاناي وبلىسىنداعى اتباسار كەن ورنىنداعى ءىرى مەتاللۋرگيالىق زاۋىت، ماڭعىستاۋ وبلىسىندا مۇناي- گاز قۇرال- جابدىقتارىن شىعاراتىن زاۋىت، مۇلدەم جاڭا قازاقستاندىق برەند - قوستاناي، شىعىس قازاقستان اۆتوموبيلدەرى» ، - دەپ اتاپ ءوتتى ءىرى جوبالاردى ق ر پرەزيدەنتى.

مەملەكەت باسشىسى قازاقستاننىڭ اۋىل شارۋاشىلىعى تاۋارلارىن وندىرۋشىلەر گليسوفاتتىڭ جەتىسپەۋشىلىگىن باستان كەشىرىپ وتىرعانىن اتاپ ءوتتى. «بىزدە بولعان ەمەس، سىرتتان اكەلەتىنبىز. ەندى مۇنداي حيميالىق تىڭايتقىش شىعاراتىن زاۋىتتى وڭتۇستىك قازاقستاندا سالامىز» ، - دەدى ەلباسى.

ەسكە سالا كەتەيىك، كەشە ن. نازاربايەۆتىڭ قىتايعا جاساعان مەملەكەتتىك ساپارى اياسىندا ق ح ر ءتوراعاسى شي جينپينمەن، ءۇش قىتايلىق كورپوراتسيانىڭ (CNPC، CITIC Group, Qinghua) باسشىلارىمەن كەزدەسۋلەرى ءوتىپ، 12 ەكىجاقتى قۇجاتقا قول قويىلعان بولاتىن.

 ساپار 3 - قىركۇيەككە دەيىن جالعاسادى. بۇگىن ق ح ر مەملەكەتتىك كەڭەسىنىڭ پرەمەرى لي كىشياڭمەن كەزدەسۋ وتەدى.

 بەيسەنبى كۇنى ق ر پرەزيدەنتى قىتاي حالقىنىڭ جاپوندىق باسقىنشىلارعا قارسى كۇرەسى سوعىسىنداعى جەڭىسىنىڭ 70 جىلدىعىنا ارنالعان سالتاناتتى پارادقا قاتىسادى.

  اۆتور: مارلان جيەمباي  

سوڭعى جاڭالىقتار